Endrar køyremønsteret etter naboinnspel
Bebuarar i Grovagjelet varsla Kvam herad om farlege situasjonar. No vert køyremønsteret endra.
Det informerer Statens vegvesen om i eit mellombels vedtak 1. desember.
For å betra tryggleiken og unngå opphoping av køyretøy og farlege situasjonar, har vegvesenet vedteke at heile Grovagjelet skal vera einvegskøyrt.
– Dette var gode nyheiter, skriv bebuar Vemund Barane-Birkeland i ei melding etter å ha fått meldinga.
Det er den mest fornuftige løysinga, meiner han. Det var Kvam herad som bad vegvesenet om å vurdera det mellombelse køyremønsteret på nytt. Heradet viste til erfaringane bebuarar har gjort seg, spesielt i samband med henting og levering av skuleborn.
Endringa gjer at bebuarar langs Grovagjelet må køyra opp ved Mo Sport for å koma fram til husa sine med bil.
Skiltinga skal på plass så snart som råd, opplyser Rune Nordheim i Kvam herad. Det eine skiltet vert truleg flytta allereie dei næraste dagane. På grunn av tele vert permanente skilt truleg ikkje sette opp med det fyrste, men alternative løysingar kjem, seier Nordheim.
Trafikkreguleringa gjeld frå skilta er komne på plass til seinast 25. oktober 2025.
