– Endeleg skal me opna

Restauranten har ope fredag og laurdag denne veka og neste veke. Hotellet tek imot overnattingsgjester frå 5. juni. Etter det vert restauranten open dagleg.

Tina Våtvik Olsen er driftsdirektør i Fjordtind Hotels AS, som driv hotellet i Øystese. Om lag 90 prosent av dei tilsette er permitterte. Olsen gler seg over at opninga i alle fall vil føra nokre av dei attende på jobb. Kor mange gjester ein kan rekna med å få den første tida, er ho usikker på, men Olsen seier at ho har merka ei endring dei siste par vekene.

– Me ser at nordmenn har byrja bestilla hotellrom att. Målet må vera at me får nok aktivitet til å halda ope gjennom sommaren. Å måtta stenga att i midten av juli ville vore ei fallitterklæring. Men eg kjenner meg ganske trygg på at me skal klara å stå gjennom sommaren, sjølv om det kan verta med minimumsbemanning. Dersom me ikkje tapar meir på å halda ope enn me ville gjort på å halda stengt, skal me halda ope, seier ho.

Ekstra reinhald

Olsen er overtydd om at det er trygt å eta i restauranten og bu på hotellet. For å sikra god avstand mellom gjestene, vert kapasiteten i restauranten redusert til om lag halv. Både på kjøkkenet og i restauranten er det stort fokus på hygiene. Dei tilsette skal sørgja at restaurantborda vert vaska med sprit mellom kvar gjest og at all mat vert servert individuelt. Toaletta skal vaskast ein gong i timen. Ingen tilsette får koma på jobb dersom dei kjenner seg sjuke.

Også på romma følgjer dei tilsette strenge rutinar. I tillegg til vanleg hotellreinhald vert alle flater, som dørhandtak, nattbord, pult og på toaletta, reingjorde med sprit mellom kvar gjest.

Frukostbuffé vert det ikkje med det første. I staden får hotellgjestene tilbod om individuelt pakka frukostar.

– Håpar badet opnar snart

Det er usikkert når Hardangerbadet opnar dørene att. Mange restriksjonar vert mjuka opp 15. juni, og Olsen seier ho håpar Hardangerbadet kan byrja ta imot gjester att etter denne datoen. Hardangerbadet er eit viktig trekkplaster for hotellet.

– Eg er veldig spent på kva som skjer med badet. Det er gjestene våre òg. Me får stadig telefonar frå potensielle gjester som spør om dette. Me er i tett dialog med kollegaene våre på Hardangerbadet, men dei veit ikkje så mykje meir enn me gjer, seier ho

Fjordtind Hotels driv hotell i Øystese, Ulvik og Eidfjord.

– Sjølv om mange nordmenn reiser på hotellferie i eige land i sommar, vil ikkje dette vera nok til å kompensera for utlendingane som forsvinn. Det er frå mai til september hotella våre tener pengane som trengst for å halda det gåande gjennom lågsesongen. Me får pengar frå kontantpakkane til regjeringa, men det er ikkje nok at me får støtte no. Me håper me kjem til å få støtte ut året, seier Olsen.