Elkem Bjølvefossen vart årets verksemd
Kvam Næringsråd har kåra Elkem Bjølvefossen i Ålvik til årets verksemd for 2023.
Prisen vart delt ut på årsmøtet 19. mars, opplyser næringsrådet i eit presseskriv.
I utveljinga har rådet lagt vekt på at vinnaren er ei viktig hjørnesteinsverksemd i Kvam. Verksemda vart grunnlagd i 1905 og har i dag 160 tilsette. Gjennom generasjonar har verksemda bygd seg opp til ein solid posisjon i ein konkurranseutsett marknad. Bjølvefossen er ein attraktiv arbeidsplass som legg vekt på å rekruttera lokal arbeidskraft, skriv næringsrådet.
Årleg vert om lag 60.000 tonn magnesiumhaldig ferrosilisium produserte i Ålvik. Avgassen frå omnane vert reinsa og microsilica tekne ut. Microsilica vert nytta mellom anna som forsterking i betong til bruer.
Administrerande direktør Hroar Holm Carlsen er stolt over å ta imot prisen på vegner av ei flott bedrift med særs flinke og erfarne tilsette, som over generasjonar har bygt verksemda opp til å verta verdsleiande i sin bransje, skriv næringsrådet.
