Elevar tok eit djupdykk i havet
Laurdag konkurrerte 14 lag i First Lego League i Odda. – Me var litt på villspor då me øvde, men det gjekk overraskande bra, seier Victoria E. Svåsand frå Jondal skule.
Svåsand var éin av ti elevar i 10.-klasse på Jondal skule som var med på tevlinga. Laget kalla dei «Monkeybusiness».
First Lego League er ein kunnskaps- og teknologikonkurranse for born og unge mellom 6 og 16 år. Temaet for årets tevling var «Submerged», som tyder under havoverflata. Dei siste to månadane har elevane «forska» på og gjort eit teoretisk djupdykk i tematikken.
Målet har vore å laga ei innovativ løysing på problem som ikkje eingong vaksne har svaret på.
Fleire tenkte likt
Også Andreas L. Njåstad var med laurdag. Han har delteke i den same konkurransen på skulen før, men ikkje vore med til regionkonkurransen i Odda. Det har vore kjekt å vera med, synest han.
Njåstad og Svåsand seier at «Monkeybusiness» har sett mest på korallar og anna som deira generasjon både kan sjå og påverka. Såleis enda dei med å laga ein robot som kan saumfara havbotnen og kartleggja korallar. Det er urealistisk å stoppa all tråling, seier Svåsand. Med ei slik kartlegging av korallar kan fisketrålarar unngå sårbare område.
– Me tenkte at «alle» andre kom til å laga noko som samla inn plast, men det var visst ikkje berre me som tenkte slik, seier ho.
Turneringa starta laurdag føremiddag. Litt før klokka 13.30 starta kvartfinalane, og ikkje lenge etter melde Njåstad at «Monkeybusiness» si reis stoppa der. Njåstad og Svåsand er likevel nøgde. Det gjekk veldig bra, synest dei.
– Vil snu trenden
First Lego League byrja som eit prøveprosjekt i 2021. No får elevar i Ullensvang vera med på tevlinga éin gong på barneskulen, og ein gong på ungdomsskulen.
– Det er fantastisk å sjå kor engasjerte born og unge kan bli i teknologi og vitskap når dei får gjera det på sine premissar, seier prosjektleiar Hilde Norheim, som har koordinert turneringa i Ullensvang, i ei pressemelding frå Tekna.
Tekna er fagforeininga for 110.000 naturvitarar, teknologar og studentar, og arrangerer First Lego League. I pressemeldinga seier Elisabet Haugsbø, president i Tekna, at arbeidsmarknaden skrik etter teknologi- og realfagskompetanse. Det trengst meir praktisk læring for å få ei større forståing og interesse for realfaga, meiner ho.
– Nøkkelen til å snu trenden er å starta tidleg og gjera faga meir praktiske.
