– Elevar må få sjå Auschwitz
Gard Folkvord (Ap) ber om at det vert skipa til ei årviss reise til konsentrasjonsleiren Auschwitz-Birkenau for tiandeklassingane i Ullensvang.
Han er avtroppande kommunestyrelem i Ullensvang, og skriv i ein interpellasjon at hans siste framlegg frå den kommunale talarstolen skal verta som det fyrste, for snart 32 år sidan.
Han ynskjer at det i samarbeid med ungdomsskulane vert greidd ut ei sak til handsaming i kommunestyret om korleis ein kan organisera og finansiera ei slik reise i regi av «Dei kvite bussane».
Dei kvite bussane vart eit omgrep på slutten av andre verdskrig, då grev Folke Bernadotte ifylgje Wikipedia henta heim om lag 15.000 skandinavar som var fangar under nazistane.
I starten på 1990-talet vart organisasjonen Dei kvite bussane stifta, som svar på at nynazistisk tankegods hadde fått fotfeste, og der særleg unge menneske var sårbare. På nytt ville ein senda bussar til konsentrasjonsleirane, denne gongen fulle av skuleelevar, for å læra om Holocaust.
