Elevar i skulebuss vart vitne til dramatikk
Ein buss med skuleelevar vart ståande i bilkøen ovanfor bustadbrannen i Norheimsund torsdag.
Borna i bussen skal ha sett skadde som vart tekne hand om av helsepersonell, i tillegg til at dei såg sjølve brannen. Nokre skal ha reagert negativt på inntrykka.
Dette fekk rektor Linda Haugland Jondahl ved Norheimsund skule seinare på dagen melding om. Meldinga kom frå ein av foreldra til eit barn som var om bord på skulebussen.
Sende ut info
Jondahl valde på bakgrunn av denne informasjonen å senda ei melding til alle føresette til elevar på skulen, gjennom kommunikasjonsappen Transponder.
Der opplyste ho om at skulen ville vera merksam på eventuelle reaksjonar hjå elevane fredag, og at ein helsesjukepleiar ville vera til stades på skulen.
Jondahl, som sjølv ikkje har full oversikt over trafikksituasjonen som oppstod i samband med brannen, opplyser at ho drøfta meldinga til foreldra med leiaren i det kommunale kriseteamet før ho vart send. Rektoren fortel at for henne var det viktigaste å tryggja alle om at borna ville verta mottekne på ein god måte og at dei som trong nokon å snakka med, ville få det.
– Meir uflaks
Brannsjef Torleif Ones i Kvam herad stadfestar at ein skulebuss vart ståande og venta i samband med at brann- og redningsmannskapet og politiet stengde fylkesvegen slik at luftambulansen kunne landa.
Han opplyser at dei involverte naudetatane hadde nok med sitt då dei skadde vart handterte i ein kritisk fase.
– Helikopteret kom då det kom. Dette er slikt som kan skje, og dette fekk ein diverre ikkje gjort noko med i denne fasen. Det er meir uflaks enn aktløyse at bussen hamna der, seier Ones om situasjonen.
Brannmannskap og politi gjekk etter kvart om bord i bussen, men då var det allereie for seint å skåna borna for inntrykka, fortel Ones.
