Elevar fekk møta minister

Skulstad er frå Bjørkheim i Samnanger og går i 3. klasse ved Kvam vidaregåande skule.

Møtet gjekk føre seg i Klima- og miljødirektoratet i Oslo 19. mai. Eide samla talspersonar for 15 barne- og ungdomsorganisasjonar for å høyra kva dei meiner om saka.

På klimatoppmøtet til FN i Paris i 2015 vart 195 land einige om ein avtale om kutt i utslepp av karbondioksid som skal avgrensa den globale oppvarminga til mellom 1,5 og 2 grader.

Minister møtte mange

Eide hadde ville ha med eit breitt spekter av organisasjonar i innspelsmøtet. Det handla om at verdas nasjonar på sist klimatoppmøte bestemte at dei skulle gå gjennom sine eigne klimamål, både dei realistiske og dei ambisiøse.

Gjestene var alt frå Skulstad, som møtte for Noregs Ungdomslag, til Natur og Ungdom og Raudekrossen.

Ungdomslaget er ikkje ein miljøorganisasjon, men Eide ville likevel ha han med, fordi det handlar om mykje meir enn berre å kjempa for politikken, seier Skulstad.

Gjestene fekk halda eit innlegg på tre minutt kvar. Dei valde fritt kva dei ville snakka om.

Berekraftige forbruksmønster

Skulstad snakka om forbruksmønstera våre og om kva for val me gjer.

Ein burde kanskje setja eit tydelegare fokus på at forbrukarane må tenkja gjennom vala dei gjer, seier ho. Ikkje minst bør verksemder få kunnskap om korleis dei skal marknadsføra produkta for å leggja til rette for eit godt val, seier Skulstad.

– Ofte vert miljøvenlege produkt tenkte på som noko mjukt og skjørt. Du kjøper ein miljøvenleg og berekraftig sjampo til håret ditt, for det har godt av eit naturleg produkt. Men viss du skal ha noko robust til å vaska av flekker på bilen din, så kjøper du noko med store varseltrekantar, for du trur ikkje at det miljøvenlege produktet fjernar flekkene. Det handlar om korleis me tenkjer, seier Skulstad.

– Ambisiøs minister

Ho var den siste i gruppa som heldt innlegg for statsråden.

Før henne hadde fleire organisasjonar kome med ein sterk miljøbodskap. Dei snakka om kva mål ein bør setja seg, og kva sektorar me bør kutta i.

– Eg tenkte det var fint å snakka om ei anna side av saka, seier Skulstad.

– Korleis var det å møta ministeren?

– Veldig spanande. Han er ein hyggjeleg mann, og eg syntest han svara godt for seg. Eide hadde førebudd seg godt. Han verka å vera ein ambisiøs fyr som ser problema og utfordringane me har. Me får håpa at han innfrir, seier Skulstad.

Lite om klima i skulen

– Får de god undervising i klima og miljø i skulen?

– Eigentleg ikkje. No har me vore heldige og hatt nokre lærarar som har valt sjølve å fokusera på det, men læreplanen stiller altfor lite krav om det. Det er mykje opp til læraren, så då vert det varierande kva ein får, seier ho.

Skulstad trur det vert naturleg for henne å engasjera seg i miljø- og klimasaker. Ho vil ikkje tenkja at dei ikkje er noko som gjeld henne.

– Eg trur alle må innsjå at det gjeld oss alle, før me får gjort noko, seier ho.

– Kongar på haugen

– Er du uroa over klimasituasjonen?

– Ja, absolutt. Eg er uroa i den grad at eg trur det vert vanskeleg for oss alle å akseptera det me lyt ofra for å få til endringar. For det er klart at når me lever som kongar på haugen og har ein veldig høg levestandard og forbruk, som me er vortne vane med, så er det tøft å gje det opp. For me veit kor godt me kan ha det. Det er vanskeleg å gå bort frå.

Skulstad er usikker på om ho vil satsa på politikken. Ho har sete fleire år i ungdomsrådet i Samnanger kommune, og har nett tredd inn i landsstyret i Noregs Ungdomslag. Ho har òg sete i styret på fylkesnivå og i lokallaget.

Skulstad har elles vore økonomisjef i Kvam AUF.

Til hausten har ho søkt på jusstudiet i Bergen.