Elev i Kvam påvist smitta – 43 nærkontaktar avdekte
Ein elev ved Kvam vidaregåande skule har testa positivt for korona.
Det bekreftar Samson Håland, konstituert rektor på Kvam vidaregåande skule. Eleven testa positivt fredag føremiddag, og sit i isolasjon. Smittesporingsarbeidet er i gang, og nærkontaktar er sette i karantene.
43 nærkontaktar er avdekte, fire av dei i andre kommunar. Dei som er i Kvam, vart testa fredag, og svar er venta laurdag. Dei vil verta testa igjen ei veke etter den siste gongen dei var eksponerte for smitte, opplyser Kvam herad fredag kveld.
Artikkelen held fram under annonsen.
Skulane i Vestland har vorte oppfordra til å testa elevane ved skulestart.
— Me hadde eit prosjekt i vår der me testa alle dei vidaregåande elevane i fylket to dagar i veka for å opparbeida oss kunnskap. Etter dette har me hatt ein del testar liggjande, og anbefalte difor testing ved skulestart for å hindra villsmitte, seier Bjørn Lyngdal, avdelingsdirektør for opplæring og kompetanse i Vestland fylke.
