– Elev gjorde ikkje noko ulovleg
Eleven ved Kvam vidaregåande skule som testa positivt for covid-19 og tidlegare hadde vore i kontakt med jamaldringar i totalt fire kommunar, slepp straff.
Det skriv Bergens Tidende.
Ordførar i Ullensvang, Roald Aga Haug, valde å melda personen til politiet for brot på smittevernreglane.
— Meldinga gjeld brot på karantene, men me finn ikkje at eleven var i karantene etter covid-19-forskrifta, seier politiadvokat Laila Karin Skeide til BT.
– Det kan godt vera at eleven har fått råd frå helsepersonell som vedkomande ikkje har følgt, men me må skilja mellom det som er straffbart etter forskrifta og det som er tilrådingar frå helsestyresmaktene, seier politiadvokaten.
Å halda ein meter avstand til andre og ikkje senda born på skule eller i barnehage med luftvegssymptom er også slike råd, påpeikar ho.
– Det er viktig at alle følgjer råda frå helsestyresmaktene, men me må sjå til regelverket og kan ikkje straffa for noko som ikkje fell inn under lova, seier Skeide.
Ullensvang-ordføraren tek avgjerda til etterretning.
– Denne saka har skapt mykje merksemd, og det har nok vore ei belasting for vedkomande som har vore i denne situasjonen, seier han.
Smittetilfellet utløyste storstila smittesporing og testing. Om lag 70 ungdomar vart testa for covid-19 etter dette, men det vart ikkje påvist fleire smittetilfelle.
