Eitt år med krig i Europa
– Lat oss syna våre nye sambygdingar – og verda – at me står saman med det ukrainske folk!
Med desse orda inviterer kyrkja i Kvam til ei markering fredag 24. februar av støtte til det krigsråka landet. Det er eittårsdagen for det russiske åtaket på Ukraina.
Det siste året har tallause menneske vorte drepne, såra, utsette for overgrep og drivne på flukt. Om lag 40.000 ukrainske flyktningar har kome til Noreg – og nokre av dei har kome til Kvam.
På Vestlandet er det planlagt 11 arrangement for å markera solidaritet med Ukraina. I Kvam vert det skipa til ei markering i Norheimsund kyrkje. Arrangementet vil by på den ukrainske nasjonalsongen, ordførartale og eit ukrainsk kulturinnslag. Etterpå vert det fakkeltog til haldeplassen.
Arrangementet er organisert av Grannehjelpa, Kvam herad, KIA (Kristent Interkulturelt Arbeid), og Lions Club Norheimsund.
Nesten 100 ulike stader, også Ullensvang kommune, skal ha eigne arrangement. Bak dei lokale arrangementa står ukrainske foreiningar, kommunar, politiske parti og ulike organisasjonar.
I Ullensvang startar markeringa i Almerkeparken, før det vert fakkeltog til rådhusparken. Ordførar Roald Aga Haug skal tala, og Isak Al Bayati, Anna Rivna og Norunn Rød Markhus skal halda appellar, opplyser kommunen fredag morgon.
