– Eit lukketreff

Det opplyser direktør Åsmund Kristiansen. Kjosås kjem frå stillinga som kunde- og marknadskonsulent i Sporveien AS, og har nyleg flytta til Kvam med familien.

Kristiansen seier at det vert spanande å få Kjosås på plass, som danka ut 23 andre søkjarar. At så mange søkte på stillinga, overraska han.

– Det var utruleg bra! Så me vart positivt overraska der. Det var mange gode søkjarar òg, seier direktøren.

Kjosås gler seg over tilsetjinga, og fortel om ein omstendeleg rekrutteringsprosess. Ho byrjar i jobben 1. mars, og området ho skal tena, er stort. Tidlegare har Kjosås berre vore innom Kunsthuset Kabuso og Ingebrigt Vik-museet, så no gler ho seg til å verta kjend både med regionen og kulturhistoria.

– Det er ei unik moglegheit, og eg gler meg veldig. Det er ikkje kvar dag slike stillingar kjem ut, så dette var jo eit lukketreff! Det passar meg midt i blinken, seier Kjosås.

Stillinga er i utgangspunktet sett saman av to halve stillingar som marknadsførar og webredaktør. Det er eit strategisk val, seier Kristiansen. Både for å få ei heil stilling, men også fordi han meiner det er eit stort behov for det. Det er mykje informasjon som skal ut.

– Å løfta det feltet litt tenkte me kunne vera ein fordel. Me vil prøva å jobba litt meir med kommunikasjon, seier han.

Også stillinga som avdelingsleiar for Hardanger folkemuseum på Utne og eit vikariat som avdelingsleiar ved Hardanger fartøyvernsenter har vore lyste ut. Prosessen er i siste fase no, fortel Kristiansen.