Leiar i Jondal idrettslag, Gudmund Toreid, seier til Hardanger Folkeblad at idrettslaget er spesielt oppteken av at familiar og born skal ha moglegheit til å vera med.

– Eit idrettslag i vekst

På kort tid er medlemstalet til Jondal idrettslag mangedobla.

Ragnhild Økland Børven
Publisert Sist oppdatert

I 2020 kunne idrettslaget telja 160 medlemer. To år seinare er talet 511, og omfattar både jondølingar, utflytta jondølingar og hyttefolk. Det fortel leiar i Jondal idrettslag, Gudmund Toreid.

Det var Hardanger Folkeblad som fyrst omtala saka.

Idrettslaget har teke fleire nye grep, fortel Toreid til oddabladet. Ein lyt mellom anna ha medlemskap for å melda seg inn i JondalGym, og medlemskapen gjev dessutan halv pris på årskort på Fonnavegen. Sistnemnde tiltak har hjelpt mykje på veksten. Toreid seier til avisa at han trur mellom anna hyttefolket har fått nye insentiv for å melda seg inn, fordi dei då kan nytta løypenettet.

Prinsippet er at alt skal vera gratis om ein er medlem, og at medlemskapen skal ha låg pris. Prisen er 500 kroner i året, og det vert kravd korkje påmeldingsavgift eller startavgift, skriv Hardanger Folkeblad.

All aktiviteten i idrettslaget er basert på frivillig innsats, seier Toreid til avisa. Ingen får godtgjersle for arbeidet. I medlemsmassen er 357 vaksne og 154 born.

sosiale tilhøve nyhende jondal idrettslag jondal frivillighet fritid familie og born
Laga med Labrador CMS