Eirik (33) frå Ålvik er årets leiartalent

Stranden er administrerande direktør i selskapet 24SevenOffice, eit selskap som tilbyr programvare for rekneskap, løn og logistikk. Omsetninga i selskapet har meir enn dobla seg sidan kvemmingen tok over for tre år sidan, skriv nettavisa, som sjølv står bak kåringa.

Prisen vart delt ut i Oslo onsdag.

– Jobben er ein stor del av livet, så det er viktig å ha med ein god gjeng. Det er eg så heldig å ha, sa vinnaren, ifølge E24.

Stranden voks opp i Ålvik ved Hardangerfjorden. Han har ei sivilingeniørgrad i matte og fysikk frå NTNU, og har arbeidd i New York og Oslo før han blei administrerande direktør for 24SevenOffice, skriv E24.

No er han leiar for 200 tilsette i Noreg, Sverige, Danmark og USA. Ifølge juryen har han ei eineståande evne til å skapa ein kultur for høg yting.

Også to andre kvemmingar hevda seg. Karoline Brunborg Marøy frå Norheimsund, direktør for sal og kundelojalitet i NextGenTel, var mellom dei ti beste i kategorien årets salsleiar. I kategorien årets marknadsførar vart Inger Lise Kvalvik frå Øystese nummer tre. Ho er avdelingsleiar for digital marknadsføring og analyse i DNB.