Ein vêrutsett bransje

Natalie Nisamjan er nokså fersk dagleg leiar i Hardangerbadet AS. Ho overtok stillinga for seks månader sidan, og dette er den fyrste sommaren ho har ansvaret for å freista tilreisande og kvemmingar til å bada innandørs.

Nisamjan fortel at badeanlegget ikkje har hatt målretta sommarkampanjar for trening og bading.

– Me har tilbod til alle, men me har ikkje marknadsført tilboda som sommarkampanjar. Nokre bad plar ha aktivitetar om sommaren, og det hadde me nok hatt viss ikkje eg var såpass ny. Det har vore mykje anna å hengja fingrane i, seier Nisamjan.

Ho har fokusert på å setja seg inn i eit vanleg driftsår, men fortel at Hardangerbadet alltid har tilgjengelege korttidsabonnement for dei som ynskjer det.

Nisamjan har mange planar, men dei må vera undersøkte og marknadsførte før ein set i gang. Ho ynskjer ikkje å starta noko som vert halvvegs.

– Det må vera bra, slik at folk ynskjer å koma tilbake, seier ho.

Neste sommar ynskjer ho og kollegaene mellom anna å starta dagsleir for born. Nisamjan håpar at Kvam herad vil vera med på å samarbeida om tiltaket.

Regn gjev vekst

Hardangerbadet har hatt færre besøkjande denne sommaren enn i fjor. I 2023 var 7.035 besøkjande innom i sommarsesongen. I år har det til no vore 6.022 besøkjande. Dette talet manglar tre dagar på sommarsesongen og rommar ikkje dei som vert etterfakturerte for juli.

På dagar med regn har det vore fullt hus, og Hardangerbadet har måtta takka folk for tolmodet, og har – når det har vore veldig fullt – føreslege at gjestene kunne koma tilbake ein annan dag.

– Når det er fint vêr, ynskjer folk å bada utandørs, seier Nisamjan.

Ein del nyttar Hardangerbadet sin badebutikk og kafé også når sola steikjer.

Esmée Van der Linden har arbeidd som badevakt i Hardangerbadet i to år. I tillegg til å patruljera bassengkanten står ho i badebutikken og kafeen.

– Folk vil ha den berømte toasten vår, og kuleis er alltid populært, seier Linden.

Gjestene som har vore på besøk i sommar, er svært nøgde med tilbodet og sørvisen. Linden får tilbakemelding frå gjestene nesten dagleg om at dei kosar seg hjå Hardangerbadet og at dei har lyst til å koma tilbake. Denne sommaren har «wibiten» som er sett opp i 25-metersbassenget, vore spesielt populær. Det er ei oppblåsbar hinderløype.

– Den synest borna er veldig morosam, seier Linden.

– Hardangerbadet tiltrekkjer seg mest småbarnsfamiliar. Par eller vaksne vil heller oppleva naturen, seier Nisamjan.

Mange tyskarar

Dei besøkjande som kjem, er kvemmingar, norske og utanlandske turistar. Av dei utanlandske turistane er dei fleste tyskarar. Fleire av dei som har prøvd badet tidlegare, kjem tilbake og har gjerne med seg born.

Nisamjan fortel at det har vore fleire grupper innom badet i år. Dei har mellom anna hatt besøk av Robin Hood Huset, som er ei stifting for økonomisk vanskelegstilte og nettverkssøkjande i Bergen. Stiftinga arrangerte tur til Hardangerbadet for å gje familiar med låg inntekt moglegheit til å ta med borna på aktivitetar i sommarferien.

Også Hålandsdalen leirskule, Røde Kors omsorg frå Eidfjord, alpinturistar som er på Folgefonna og Framnes Kristne Vidaregåande Skule har nytta seg av bassengtilbodet i Øystese. I slutten av juni arrangerte Framnes «familiedag» og fylte nesten heile badet med 150 gjester.

Tilpassar seg

Når store grupper tingar plass, prøver Nisamjan å leggja til retta for at dei kjem utanom vanlege opningstider, fordi det er utfordrande å stengja badet for medlemer og andre gjester.

– Då må me informera om det i god tid på førehand, seier ho.

I det siste har fleire av gruppene bestilt matservering. Nisamjan fortel at det er moro å stella i stand. Då lagar dei tilsette maten i kafeen og dekkjer langbord.

Hardangerbadet har ingen statistikk over korleis badegjestene finn fram til dei, men marknadsfører seg i fleire kanalar. Selskapet samarbeider med Visit Hardangerfjord for å nå utanlandske turistar, medan ein når betre fram til meir lokale gjester gjennom til dømes Media Vest og lokalavisa.

– Me har behov for å vera synlege, slik at me kan auka besøkstalet, seier Nisamjan.