– Ein stor dag

Den ferdige ordførarkjeda vart tysdag overlevert til ordføraren frå kjedenemnda og kunstnar og gullsmed Siri Kvalfoss i Tyssedal, som fekk oppdraget med å forma «smykket».

— Takk for tilliten. Det er ei stor ære å få lov til å laga ei ordførarkjede, sa Kvalfoss i samband med overrekkinga i kommunestyremøtet tysdag.

— Me er svært nøgde med kjeda me har fått. Ho er dynamisk og original som ikkje er konstant, sa Emil Tomasgard (Ap), som har leia den politiske nemnda som har arbeidd med prosjektet.

Han sa at kjeda, med element som trekantar, fjord, vatn, fonn og ein turbin, symboliserer at tre kommunar har smelta saman til éi eining med nye mogelegheiter, men samstundes varetek det tradisjonstunge kommunevåpenet.

I nemnda har også Ingvild Hauso (H), Marit Jensen Måkestad (Ap) og Kåre Grønsnes (SV) hatt plass. Dei har hatt det kjekt og lært mykje, forsikra leiaren.

Grønsnes orienterte om den faglege bakgrunnen for symbolikken i kjeda, som fekk 44 prosent av røystene i ei meiningsmåling. Sentralt i kjeda er den franske lilja, ein madonnablom, som har vore i bruk lenge. Lilja, som òg er med i kommunevåpenet, symboliserer bløming, vekst og optimisme.

Grønsnes påpeika at den franske lilja som er med i kjeda, har vore i bruk lokalt — også i Jondal. Nils Guttormsen Torsnes nytta nemleg ei gul lilje på kvit botn på 1500-talet.

I ein tidlegare versjon av artikkelen vart Kåre Grønsnes sitert på at Torsnes nytta symbolet på 1600-talet. Han er feilsitert, for han sa 1500-talet. Artikkelen vart retta fredag 10. september klokka 14.52.

Les også: