– Ein stad for sorg og ettertanke
Ein komité har søkt Kvam herad om 250.000 kroner i stønad til arbeidet med namna minnelundar.
Pengane skal ifylgje søknaden gå til prosjektering av dei namna minnelundane i Øystese og Norheimsund, slik at ein kan lysa ut prosjekta på anbod så snart som mogleg.
Arkitekt Gøril Kjosås har laga eit skisseprosjekt for lunden i Øystese, medan Solveig Valland i Geoplan AS har laga eit tilsvarande prosjekt for lunden i Norheimsund. Det må lagast gravplassplanar som fellesrådet skal vedta og bispedømerådet godkjenna. Ifylgje søknaden er det truleg eit stykke fram til prosjekta kan vera ferdige. Skissene er sende til Statsforvaltaren.
I Øystese er planen å plassera lunden vest for bårehuset. I Norheimsund er tanken å leggja han søraust for kyrkja, både med tilknyting til og skjerma for kyrkja og parken.
– Ein minnestad for sorg og ettertanke. Ein stad der det kan vera tungt, men likevel er godt å vera, skriv Valland om lunden.
Ein namna minnelund er graver i eit felt med eit sams minnesmerke der det er høve til å setja opp namneplater med namn og årstal for fødsel og død på den gravlagde.
Lisbeth Henriksen, Harald Kjosås og Gro Liland sit i komiteen som på oppdrag frå Kyrkjeleg fellesråd arbeider med saka.
