Éin person funnen død i Movatnet sundag

Vedkomande vart funnen Movatnet midt på dagen, opplyser politistasjonssjef Terje Sperrevik.

På sørsida

Innsatsleiar Svein Valland Laupsa opplyser at det var mannskap frå Røde Kors som oppdaga vedkomande under søk frå båt. Den døde er send til obduksjon i Bergen. Mannskap frå Kvam brann og redning henta opp lekamen, som var lokalisert i ei vik på sørsida av vatnet.

Laurdag vart ein død person henta opp frå elva i den øvste delen av Tokagjelet. Identiteten er ikkje kjend enno.

Framleis er éin person og éin hund sakna etter ulukka på Langvotnevatnet for ei knapp veke sidan.

Drøftar tiltak

Sundag kveld skal det vera eit tverrfagleg møte for å drøfta vidare tiltak i søket. Det vert vurdert å ta i bruk utstyr til å skanna Movatnet og sjøbotnen. Dronesøk er utført sundag og vil halda fram i Tokagjelet, opplyser innsatsleiaren.

Hovudteorien er framleis at den siste sakna personen er i Tokagjelet, men politiet utelukkar ikkje andre alternativ, ifylgje Laupsa.

Det er meldt lite nedbør dei neste dagane, noko som kan forenkla søket endå meir. Politiet ser dessutan på eventuelle tiltak ved Langvotnevatnet for å redusera vassmengda i elva, slik at vilkåra for leiteaksjonen vert betra ytterlegare.

Sikringstiltak i vatnet vert òg vurderte parallelt med leiteaksjonen, opplyser Laupsa.

Sperrevik retta ei stor takk til alle som har bidrege i leiteaksjonen. Laupsa opplyser at det er kome mange innspel undervegs, og at nokre av desse har medført konkrete tiltak i søket.

Også ordførar Torgeir Næss i Kvam herad er takksam for innsatsen. Han ynskjer at dei pårørande skal vita at eit heilt lokalsamfunn i Kvam har medkjensle med dei, ifylgje ei pressemelding frå heradet.