– Ein lyt drita ein del der inne om dette skal svara seg

Det nye anlegget i Ålvik har ein pris på om lag 17 millionar kroner, opplyser presse- og mediekontakt Per Ritzler i avdelinga Nasjonale turistvegar i Statens vegvesen til HF.

Ein rask runde med tommestokk syner at det eine toalettet er om lag tre kvadratmeter og det andre om lag 4,5 kvadratmeter stort. Det gjev ein kvadratmeterpris på om lag 2,2 millionar kroner. Den høge prisen skuldast mellom anna at rasteplassen er arkitektteikna og at 70 furustammer med røter fungerer som berande element i toalettbygget.

– Endelaust med pengar

Hallgeir Torpe er nestleiar i Norges Taxiforbund avdeling Hordaland og drosjeeigar i Øystese.

– Det verkar som det er endelaust med pengar med ein gong det er snakk om å byggja signalbygg av denne typen. Hadde eg bestemt, hadde ein brukt kanskje ti millionar på toalettet og resten av pengane på asfalt andre stader. Sjølv med ei slik fordeling må ein skita litt før dette svarar seg, seier han.

Torpe seier han tykkjer bygget er flott å sjå på, og han tvilar ikkje på at det vil verta mykje nytta av turistane.

– Men når vegstandarden er slik den er, tykkjer eg det er vanskeleg å forsvara at vegvesenet brukar 17 millionar på eit toalett. Me som ferdast på desse vegane til dagleg, ønskjer å kunna ferdast trygt, seier han.

Positivt utval

Liv Turid Lofthus er leiar i Ålvik og Ytre Ålvik Grendautval. Hennar inntrykk er at medlemene i utvalet er positive til bygget.

– Me har ikkje hatt dette oppe som ei formell sak, men styret har prata litt, og så vidt eg forstår er alle begeistra. Me tykkjer bygget er rart, spesielt og veldig flott, og er glade for at vegvesenet har valt å bruka så mykje pengar her i Ålvik, seier ho.

Ho er klar over at det finst dei som synest at pengane burde vore brukte på ein annan måte.

– Når dette kjem opp, prøver eg å forklara at desse pengane er sette av til turistvegprosjekta til vegvesenet. Hadde me takka nei til bygget, hadde ikkje det ført til fleire sjukeheimsplassar eller betre vegar. Det hadde ført til eit liknande bygg i ein annan kommune, seier ho.

Harald Bech-Hanssen har ansvaret for økonomistyring i avdelinga Nasjonale turistvegar i vegvesenet. Han stadfestar det Lofthus seier.

– Pengane som er brukte i Tyrvefjøra, er øyremerkte gjennom statsbudsjettet til å byggja denne typen attraksjonar. Desse pengane kjem ikkje frå vegbudsjetta. Eg er overtydd om at bygget i Tyrvefjøra kjem til å verta ein turistattraksjon om det vert marknadsført på den rette måten, seier han.

– Aukar attraktiviteten

Ordførar Torgeir Næss (Ap) meiner toalettanlegget er med på å gjera Ålvik til ein meir attraktiv stad.

– Det finst folk som reiser rundt berre for å sjå slike bygg. Dessutan er anlegget stort sett laga og levert av lokale folk. Bygget viser kva me kan få til her i Kvam, seier han.

– Pengane burde ikkje vore brukte til noko meir fornuftig?

– Det er Statens vegvesen som har brukt pengane, og når dei brukar pengar på slike turistvegmonument, tykkjer eg det er bra at dei vert brukte her i Kvam.

Heradsstyremedlem Geir Madsen (SV) har mange av dei same tankane.

– Eg har vore og sett på bygget fleire gonger og tykkjer det er veldig spanande. Turistvegprosjekta er satsingar i distrikta og er med på å løfta fram utkantane. Det går sikkert an å hevda at ein på statleg nivå burde ha flytta pengar frå turistvegprosjekta til vegbygging, men det er ikkje noko me i Kvam direkte kan påverka. Vegvesenet finansierer dette. Då tykkjer eg det berre er positivt at ein investerer her i Kvam, seier han.