— Ein hyllest av kameratskapet på fjellet
Arne-Kristian Glück-Teigland frå Øystese er nominert til prisen årets eventyrar.
I mars i fjor tok Arne-Kristian Glück-Teigland — «AK» — med seg ti barske karar på «Dronning Sonjas Honnørmarsj». Kameratfylgjet — over halvparten kvemmingar — gjekk på ski frå Lofthus til Slottsplassen. No er kvemmingen nominert til årets eventyrar.
— Det er kjekt. Det kjekkaste er at nominasjonen er basert på ein tur som mange kan klara. Det er ikkje Mount Everest, seier eventyraren frå Øystese.
Prisen skulle etter planen delast ut på «Eventyraften» på Chateau Neuf i Oslo 22. januar, men pandemien sette ein stoppar for arrangementet. Eventyraften er arrangert av mellom andre Aleksander Gamme og Lars Ebbesen.
Målet med heidersprisen er å bidra til å realisera store og små turprosjekt, og anerkjenna ein eller fleire som har vore på sitt livs eventyr og utfordra seg sjølv i naturen. Ein vil visa fram mangfaldet av eventyrarar, som alle bidreg på sitt vis til eit varierande spekter av turar og ekspedisjonar, ifylgje heimesida til Eventyraften.
— Rein moro
AK løftar fram Dronningmarsjen som ein sosial tur med historiske rammer.
— Og så er det ein hyllest av kameratskapet på fjellet. Alle 11 var like viktige. Og når ein har det kjekt, inspirerer ein andre. Det er ganske stas, faktisk! Det er moro, fortel han.
Det er viktig for AK å gjera ting ein hugsar. Å snakka med dronning Sonja om fôrhaustarar på Facetime, til dømes. Det kan ikkje måla seg med noko, ifylgje hardhausen. Opplevinga vert truleg heller ikkje gløymd med det fyrste.
— Kva er ditt livs eventyr — Dronningmarsjen eller Sørpolen?
— Det er ikkje så stor forskjell på turane, faktisk. Det handlar om å gå inn i seg sjølv. Men akkurat eventyr handlar gjerne meir om å ha det kjekt i lag med andre, meir enn den personlege kampen som vil verta kjempa på veg til Sørpolen. Dronningmarsjen var rein moro, seier AK.
Nye planar
Til hausten planlegg AK nemleg å koma seg til Sørpolen saman med Kjartan Bergsvåg frå Voss. Turen strekkjer seg over 110 mil frå Hercules Inlet til polpunktet. Førebuingane går etter planen. I lag med ulike samarbeidspartnarar er karane i gang med å testa ymse utstyr til turen.
Men akkurat no er AK oppteken med å koma seg på plass på Fagerheim Fjellstugu på Hardangervidda. Der overtok han og kona Kristin Glück-Teigland drifta frå 1. januar.
— Har de landa på fjellet?
— Om ikkje me har landa heilt, så har me i alle fall kome i gang. Kristin har vaska ned kjøkenet og prøver å få kontroll der. Me er også i prat med ein kokk som me håpar å få landa noko med i løpet av veka. Det er litt småplukk og vesen som må på plass, men det kjem seg, seier AK.
Like før jul vart AK overraska med den kommunale kulturprisen for 2021. Om han får prisen som årets eventyrar, står att å sjå. Fasiten får me 22. januar.
