Ein halv million til reiseliv
Visit Hardangerfjord AS får ein halv million kroner i stønad frå Vestland fylkeskommune.
Det vedtok hovudutval for næring 20. november. Totalt vart det løyvt 3,5 millionar kroner til sju destinasjonsselskap i Vestland. I tillegg vart det løyvt 2,2 millionar kroner til ein fleirårig innsats som skal styrkja reiselivsinnsatsen i lågsesong.
Reiselivsnæringa stod i 2023 for ei samla, rekordhøg verdiskaping på 101,4 milliardar kroner i Noreg. Det syner tal frå Innovasjon Noreg.
Ifylgje saksutgreiinga ligg det eit stort potensial i å utvikla opplevingar som er eigna for lågsesongen, innanfor ei rekkje tema med vekt på matopplevingar, kulturtilbod og aktivitetar som ikkje krev ferdigheiter på ski eller god kondisjon.
Under satsinga som gjeld heilårsaktivitet, har fylkeskommunen tiltak som seier at ein skal styrkja tilbod eigna for skuldersesong og heilårstilbod.
