Ein del jondølingar kan sleppa unna med lågare eigedomsskatt

Rådmannen tilrår å nytta ein skattesats på to i staden for sju promille for 223 næringseigedomar i tidlegare Odda og Jondal kommune som vert skattlagde for fyrste gong i 2020. Samla reduksjon i eigedomsskatten vert 3,3 millionar kroner.

Han vil gradvis harmonisera satsane, slik at dei vert like – sju promille – i heile kommunen i 2023.

Saka vert lagd fram i eit ekstraordinært møte i formannskapet tysdag og for kommunestyret dagen etter.

Eigedomsskattelova opnar for ei gradvis samkøyring av skattenivåa i samband med kommunesamanslåing. Rådmannen la før jul ikkje opp til ei slik ordning. No har han ombestemt seg, sjølv om vedtaket 18. desember på det tidspunktet var i samsvar med lova. To dagar seinare kom nemleg nye føringar frå Stortinget som opnar for ein gradvis overgang.

Årsaka til kursendringa er at dei tre kommunane har hatt ulike former for eigedomsskatt. Jondal og Odda skreiv ut skatt berre på eigedomar klassifiserte som såkalla verk og bruk med ein sats på sju promille. Næringseigedomar som ikkje var klassifiserte som verk og bruk, vart ikkje skattlagde. Ullensvang hadde ein sats på sju promille for alle eigedomar.

Rådmannen meiner det ikkje er samsvar mellom dei nye reglane og vedtaket 18. desember. Reglane seier at dei tidlegare ikkje skattlagde eigedomane ikkje kan skattleggjast med meir enn to promille det fyrste året, og at satsen ikkje kan auka med meir enn to promille kvart år.

– Slik rådmannen forstår eigedomsskattelova, kan næringseigedomane som ikkje hadde skatt i 2019, ikkje ha høgare sats enn to promille det fyrste året. Deretter kan satsen aukast jamt frå 2020 til 2022. I 2023 må satsen vera lik for alle eigedomar som er omfatta av eigedomsskattelova, skriv rådmannen.

– Ordninga inneheld ei mellombels, positivt forskjellsbehandling av nokre næringseigedomar. Ei slik handsaming er lovleg. Alternativet ville anten ha vore eit skattebortfall for kommunane eller ein brå auke i skatten for eigarane, skriv rådmannen.

Kommunen har sett i gang ei allmenn taksering av eigedomane. Politikarane ynskjer så langt ikkje å skattleggja bustader og fritidsbustader.