– Ein beklageleg feil i sonekartet
Skyss vil betala tilbake det passasjerar har betala for mykje fordi grensa for kollektivsone F har vore feil i fleire månader.
Det var Bjørg Tangerås som i eit brev til rådmannen i Kvam 6. oktober gjorde merksam på at grensa for sone F stoppa mellom Linga og Lillefosse. Ho skal eigentleg gå ved Mundheim og Gravdal, slik at heile Kvam er omfatta av sona.
Feilen vart fyrst oppdaga i november 2018. Då ordna Skyss opp i saka, etter at Kvam herad tok opp henne opp etter å ha fått eit brev frå Strandebarm Grendautval. Sonestrukturen vart difor endra i 2019.
Då sommarrutene vart oppdaterte i år, vart sona vart endra igjen, og no er ho feil, opplyser Tangerås.
Sone F skal omfatta Kvam, Modalen, Samnanger og Vaksdal.
Kommunikasjonsrådgjevar Øyvind Strømmen i Skyss har sjekka saka. Konklusjonen er at sonekartet og appen har ein feil.
– Sone F skal følgja kommunegrensa og altså gjelda til Mundheimsdalen i vest og til litt sør for Gravdal. Slik har det vore sidan 1. februar 2019, og endring av dette har ikkje vore planlagt. Etter sommaren i år oppstod det ein feil, og grensa i appen vart flytta, skriv Strømmen i ein e-post til HF.
Skyss vil retta opp i feilen snarast råd, og ber om orsaking til kundane. Om nokon har betala for mykje for reiser, kan dei kontakta kundesenteret og få pengane refunderte, opplyser Strømmen.
