Ein av desse ordførarane viser heile kalenderen, den andre ikkje

Er du av den nysgjerrige typen? Lurer du på kva dei folkevalde bruker tida si på?

På nettsidene til mange kommunar skal ein normalt sett kunna sjå kalenderen til ein ordførar.

Men inntil for nokre veker sidan såg kalenderen til Kvam-ordførar Torgeir Næss ganske glissen ut. Berre nokre få møte i veka. Den manuelle oppdateringa gjekk litt i rykk og napp.

No har det endra seg.

– Viktig for tilliten

– Det var vel Hordaland Folkeblad som gjorde meg merksam på at kalenderen min på heradet sine sider såg ganske tom ut, noko den eigentleg ikkje er, seier Næss.

Ordføraren seier at han vil spela med så opne kort som mogeleg. Derfor sjekka han om det var mogeleg å kopla opp sin personlege Outlook-kalender direkte til kommunen sine nettsider. Det var det.

– Det er så mange av avtalane mine som blir gjorde på kort varsel. Før blei dei fleste av desse ikkje fanga opp i kalenderen, fordi den blei oppdatert så sjeldan.

No blir den oppdatert automatisk, og alt kjem fram. Alt frå politiske møte til ein føreståande utanlandsferie er oppført og synleg den dagen HF er på vitjing.

– Kvifor er det så viktig at folk kan gå gjennom kalenderen din?

– Eg meiner det er viktig for å ha tillit frå folk at dei skal kunna sjå det om eg skulle møtt nokon som vil påverka meg, for eksempel, seier han.

– Kven som helst kan sjå kor du kjem til å vera. Du fryktar ikkje for eiga sikkerheit?

Næss tygg litt på spørsmålet, før han svarer:

– Nei. Det er vel kanskje den vesle risikoen me folkevalde må ta.

Ikkje alt er synleg

Heilt open og gjennomsiktig er kalenderen likevel ikkje. Fleire stader står det «privat avtale».

– Det gjeld hovudsakleg private ting, som konsertar og tannlegetimar. Men det kan også vera avtalar som er sensitive, av omsyn til sikkerheit og beredskap, seier Næss.

Ingen av dei private avtalane som er i kalenderen, går inn i den siste kategorien, seier ordføraren.

– Har tenkt over det

Kalenderen til ordførar Roald Aga Haug i Ullensvang ser ganske tom ut i forhold til kollegaen i Kvam.

Førre veke var berre to hendingar oppførte.

– Har du ikkje meir på gang denne veka?

– Eg er faktisk sjukmeld denne veka, og har vore borte frå alle møte, men denne kalenderen er uansett heilt feil, seier Haug.

Han nemner i fleng møte og planar som ikkje har blitt fanga opp. I hans eigen kalender står blant anna fire heildagsmøte og to kveldsmøte.

– Men eg er klar over at kalenderen min ser ganske tom ut på kommunen sine sider. Eg har tenkt over det sjølv.

Det er ikkje han sjølv som styrer kalenderen på nettsida, fortel Haug. Det er det andre tilsette som gjer, ein gong i veka.

– Derfor blir ikkje alle avtalar fanga opp, seier han.

Enkelte innbyggjarar har også etterlyst kalenderen, seier Haug, men det skal ikkje vera snakk om mange.

– Ser du fordelar med å ha open kalender?

– Ja, eg gjer absolutt det. Eg kunne gjerne hatt det opnare enn det er no. Det som er viktig for meg, er at det må vera lett å administrera og ikkje føra til meirarbeid.