– Eigentleg berre flaks
Det gjekk fleire timar før geologen vart tilkalla for å vurdera vegopning på E16 måndag, skriv Bergensavisen.
Fyrst litt før klokka 19 var geologen på plass, og ein times tid seinare gav han grønt lys for å opna vegen att. Vedkomande kom frå Voss.
– Det var eigentleg berre flaks at geologen som vart kontakta, hadde høve til å rykkja ut og var så nær raset, seier Knut Inge Orset, ansvarleg for flaum- og skredberedskap i Statens vegvesen, til BA.
Avisa skriv at vegstellet berre har ein geolog i Sør-Noreg og éin i Nord-Noreg som har vakt. Andre geologar er ikkje i beredskap, og det finst ingen garanti for at geologen som er tilgjengeleg, er i same fylke som rasstaden. Det finst heller ikkje krav om utrykkingstid, skriv avisa.
Ifylgje BA skal byggherren ringja vakttelefonen når ein geolog trengst. Det hende ikkje før klokka 16.41 måndag, fleire timar etter at ein stein fall på E16, fortel Orset.
Fungerande avdelingsdirektør i drift og vedlikehald i Statens vegvesen vest, Jens-Ivar Nilsen, innrømmer overfor avisa at det denne gongen tok meir tid enn det som er ideelt. Han lovar at hendinga vil verta evaluert.
