Ei veke før fristen kom tilbodet om barnehageplass

60 kvadratmeter i tredje etasje på Sagene i Oslo byrja å verta trongt med to born. Ynsket om større plass og om å bu meir landleg hadde vakse den siste tida. Då sjansen til å leiga ein einebustad dukka opp i Øystese, bestemte familien seg for å flytta vestover rundt juletider.

I juli vart det søkt om barnehageplass til det eldste barnet, og leilegheita vart seld i haust.

– Fristen for å søkja var 15. august, så då var me innanfor, tenkte me, fortel Kjosås.

Men å få barnehageplass er ikkje sjølvsagt. Barnehagane i Kvam har bala med rekruttering i haust, og fleire som søkte innan fristen i august, vil oppleva ikkje å få barnehageplass.

Seint, men godt

Etter å ha søkt i juli, høyrde ikkje Kjosås meir frå Kvam herad. I september tok ho sjølv kontakt. Då vart ho send vidare til styraren i ein av barnehagane der ho hadde søkt plass. Styraren sa til henne at barnet ville få plass, men at heradet måtte tilsetja nokon fyrst.

Det går sikkert greitt, tenkte Kjosås. Sidan høyrde ho ikkje meir før i midten av november. Då kom det ein e-post frå barnehageleiar Ingunn Mo. Der stod det at dottera til Kjosås ikkje hadde fått plass.

Det skuldast utfordringane med rekruttering, og Kjosås ville verta kontakta etter kvart, skreiv Mo i e-posten.

Dersom Kjosås og familien skulle flytta på seg, var ho nøydd til å seia opp jobben innan 1. desember. Tida byrja å verta knapp. 15. januar måtte dei vera ute av leilegheita.

Trenden har snudd

17 born søkte barnehageplass før 15. august. Ifylgje barnehageleiaren står framleis seks av dei utan plass. Borna som har lovfesta rett til plass, har fått plass. Dei som står utan plass, har ikkje rett etter lova, opplyser Mo.

– Me håpar å gje tilbod til tre av dei innan 8. desember. Dei fleste ynskjer plass frå mars eller april, så det kan framleis løysa seg, seier Mo.

– Før var det mangel på areal. No er det heilt motsett. Me har nok av areal, men manglar tilsette, seier Mo.

Ho fortel at heradet i vår planla for at born skulle få plass i løpet av hausten ved å bemanna slik at barnehagane hadde noko ledig kapasitet. Før sommarferien hadde ein enno ikkje fått tak i tilsette til alle ledige stillingar. I haust har det vore lyst ut stillingar ved fleire høve.

Kjosås fekk nyheita om tildelt barnehageplass onsdag denne veka.

– Ballar fort på seg

I den siste runden med rekruttering var det seks søkjarar. Ikkje alle var aktuelle, fortel Mo, men to av dei har denne veka fått tilbod om jobb.

– Vidare må me sjå på løysingar for føresette som har søkt barnehageplass etter 15. august. Det er per i dag 18 som søkjer om barnehageplass etter opptaket 15. august, og det kan enno koma fleire før fristen 1. januar. Dei som står på neste opptaks venteliste, ynskjer plass før 31. juli, seier Mo.

Målet er å kunna fylgja vedtaka og vera ein attraktiv kommune. Dersom ikkje ein har nok barnehageplassar, ballar det fort på seg, trur Mo.

– Det får ringverknader. Får ein ikkje barnehageplass, vel kanskje foreldre ikkje å flytta hit, seier ho.

– Vanskeleg å tidfesta

Sjølv om det i siste liten ordna seg for Kjosås og familien, har ho sakna informasjon frå kommunen. Ho synest at heradet burde ha informert om rekrutteringsproblema på heimesidene, til dømes, slik at dei som søkjer, ikkje tek det for gjeve at ein får plass.

Mo fortel at når dei søkjer barnehageplass, får føresette brev med stadfesting av at søknaden er motteken og informasjon om når dei kan venta svar. I brevet står fylgjande: «Dersom søknaden kjem utanom hovudopptaket, vil du få tilbod så snart det blir ein ledig plass i aktuell barnehage. Me kan på førehand ikkje seia kor lang tid dette vil ta.»

Normalt skal foreldre få svar om barnehagetilbod så raskt som mogleg etter søknadsfristen ved løpande opptak, og innan tre veker etter søknadsfristen ved hovudopptaket, opplyser Mo.

– I haust har fokuset vore på å lysa ut stillingar og rekruttera tilsette, og kommunikasjonen med foreldre som skal byrja etter januar, har diverre ikkje vore god nok, seier barnehageleiaren.

– Burde vore sendt

Det er óg sendt ut eit generelt skriv til føresette om at det er utfordringar med å få tak i personell, og at foreldre som får plass, vert kontakta så raskt som mogleg. Dette burde nok vore sendt ut tidlegare, vedgår Mo.

– Har Kvam herad vurdert å leggja ut informasjon om rekrutteringsproblem på heimesidene?

– Me jobbar så mykje med å få tak i folk no at me har ikkje tenkt på det. Det var ein god idé. Me har informert heradsstyret og rådmannen om situasjonen, og så håpar me jo heile tida å få løyst det, seier Mo.

Å styra forventningane litt er gull verdt, meiner Kjosås. Då slepp folk å sitja att med skjegget i postkassen, fortel ho.

Familien hennar fekk heldigvis laus skjegget i tide, og no er familien straks på veg vestover.