– Ei uoverkomeleg dokumentasjonsoppgåve
Store delar av den eksisterande turstien til Samlen går i område som i kommuneplanen er merkte som skredfarlege.
Herand Idrettslag har engasjert Byggprosjekt AS som ansvarleg søkjar for å byggja den såkalla sherpastien til Samlen. Verksemda reknar med at opprusting av turstien til Samlen vil medføra at belastinga aukar. Samstundes vil det vera ei uoverkomeleg oppgåve å kartleggja i detalj og sikra heile området mot fare for skred, meiner Byggprosjekt.
– Vårt spørsmål vert då korleis Ullensvang kommune stiller seg til eventuelle krav om utgreiing og kartlegging av tilstrekkeleg tryggleik mot skred, skriv verksemda.
Svaret frå rådmannen er at dersom det skal byggjast ut i fareområde, krevst dokumentasjon som viser at tiltaket stettar aktuelle krav i plan- og bygningslova og i byggteknisk forskrift. Dokumentasjonen skal stadfesta at det er tilstrekkeleg trygt å tillata bygging og at krava til tryggleik mot naturfarane er stetta, skriv rådmannen.
Prosjektet hadde i desember fått tildelt om lag 650.000 kroner. Det omfattar også ein parkeringsplass i nærleiken av utgangspunktet for turstien.
