Ei røyst for kulturen
Eit skikkeleg kulturtilbod i distrikta er mellom det den nyvalde politikaren Arnhild Litleré (Ap) brenn for.
Då HF ringde henne onsdag, var ho i ferd med å gjera seg klar til å reisa frå heimen i Strandebarm til Oslo. Der skulle ho spela den eldre kvinna i «I svarte skogen inne», eit stykke skrive av sambygding Jon Fosse, på Det Norske Teatret.
Med andre ord: Sjølv om tv-serien ho kanskje er mest kjend for, «Side om side», har hatt siste innspelingsdag, er kvemmingen travel. Nett kor travel frilansaren er til kvar tid, kjem an på oppdragsmengda. Det er såleis uråd å svara på kor mykje tid ho får til lokalpolitikken i Kvam. Ho ser ikkje bort frå at ho må melda forfall til eitt og anna politisk møte av omsyn til arbeidslivet.
– Me får sjå korleis det går. Eg har mykje å læra om politisk arbeid og organisering, seier ho.
Som naturleg kanskje er, brenn ho for kunst- og kulturpolitikk. I tillegg er ho oppteken av særleg psykisk helse og eldreomsorg. I Oslo, der ho har budd i fire tiår, har ho arbeidd mot politisk hald med psykisk helse, utan å vera tilknytt noko parti. Ho har sete i styret for PIO-senteret, eit støttesenter for pårørande og et kompetansesenter for pårørandesamarbeid i helse- og omsorgssektoren.
Skodespelaren har i dei seinare åra vore sentral i oppbygginga av Fossehuset i Strandebarm. Ei hjartesak for henne er kulturtilbod i distriktet.
– I Oslo har me opera, kino og teater. Me må ha gode tilbod i distrikta òg, og bygdene må bruka kvarandre. Harding Puls har gjort ein kjempejobb for å få det til, seier ho.
