– Ei eksotisk perle

– Eg opplever at det er ein slags brutalitet over det. Å sprengja i fjella – og ikkje berre øydeleggja vika, men heile området. Støy og lukt er det minste problemet. Området vil vera øydelagt for alltid, seier Audun.

Laurdag møtte karane opp i Tryglavik for å vera med på minifestivalen til Naturvernforbundet Hardanger. Det same gjorde om lag femti andre. Lukta av bål, sjø og brennande engasjement sette ramma for ettermiddagen, og dei frammøtte fekk oppleva både urørt natur, musikkinnslag og appellar.

– Ein ynda plass

Brørne Galtung er oppvaksne i Rogaland, og Eystein og Trond er framleis busette der. Audun er busett i Kvam. Kvar bidige sommar i oppveksten vitja dei besteforeldra i Jondal. Og like sikker som turen til Jondal var turen til Tryglavik. Der var alle generasjonar samla, minnest brørne.

Tryglavik var plassen ein gjekk til for å bada og kosa seg, fortel Eystein. Båtar låg fortøydde i bukta, og bakkane var fulle av folk. Det var ein ynda plass, seier han.

– Som tenåringar gjekk me gjennom tunnelen med lommelykt, legg Audun til.

Familien har tomt på Jonanes, som far deira kjøpte i 1968. Tomta er ubebygd. Faren hadde nok ein draum om å setja opp noko, fortel Eystein, men han trur det er meir naturvernmentalitet som rår i dag.

– Det er ingen av oss som har planar om å gå vidare med noko. Det er veldig urørt og flott natur der, seier Eystein.

Sjå ein videosnutt frå festivalen her:

Kjensla av noko eksotisk

Trond, som saman med kona har ein fritidsbustad i Sætveithagen, seier at dei er i Tryglavik rett som det er. Men det er ikkje Tryglavik som er mest brukt som badeplass av innbyggjarar i Jondal.

Brørne trur noko av grunnen til det er eit oppdrettsanlegg som i si tid vart plassert like utanfor. Då grodde det veldig opp i sjøbotn, og området vart opplevd som forureina, fortel karane. Kommunen har òg oppgradert andre badeplassar nærare sentrum.

Audun var innom vika med båt i fjor sommar. Då vart han imponert over kort reint det hadde vorte igjen.

– Bygda har nok delvis gløymt denne plassen, sidan det finst lettare tilgjengelege plassar nærare bygda. Det som gjorde Tryglavik ekstra attraktivt, var store flekkar med sandbotn. Den flottaste sandbotnen du kan tenkja deg! seier Eystein.

– Det var ein snev av eksotisk, legg han til.

Trond er samd. Det var unikt, seier han.

– Ingen skam å snu

Det er inga skam å snu, heller ikkje i politikken. Det meiner i alle fall Terje Kollbotn (R), som var ein av appellantane laurdag. Alle i kommunestyret fekk invitasjon, fortalde arrangøren, men berre Kollbotn og ordførar Roald Aga Haug (Ap) svara. Haug hadde ikkje høve til å stilla.

– Eg er rett og slett lei meg for at eg er den einaste kommunestyrerepresentanten i Ullensvang som har møtt opp, sa Kollbotn.

R er ifylgje Kollbotn det einaste partiet i Ullensvang som klart og tydeleg har sagt at det ikkje er aktuelt med biogassanlegg eller eit industriområde i Tryglavik. Han meiner at Tryglavik vil vera ein prøvestein for mange kampar om natur. På tampen av programmet dukka også leiar for Ullensvang SV, Steinar Sæther, opp. Han kunne fortelja at SV har snudd i saka.

– SV stemte for biogass i Tryglavik. Sidan har me gått saka nærare i saumane, og etter kvart har det vorte openbert at dette ikkje er den rette plassen for eit industrianlegg, sa han til stor applaus.

Sjå fleire bilete frå festivalen her: