– Eg trur dette har redda livet mitt

– Eg trur dette har redda livet mitt. Behagelege og gode behandlarar. Samstundes som det har vore tungt, så kjentest det alltid trygt og godt.

Slik lyder tilbakemeldinga frå ein av dei første pasientane som har fått behandling i Helse i Hardanger (HIH).

– Markant endring

I haust har 24 pasientar i tre grupper vorte behandla for angst og depresjon. Tala frå 15 pasientar i dei to første gruppene ser slik ut:

Dei fleste er i 20-åra, men snittalderen er på 32 år. Dei fleste har vore ute av arbeidslivet, hatt redusert arbeidskapasitet eller vore på grensa til å hamna utanfor på grunn av plagene. I snitt har pasientane slite med plagene – angst, depresjon, søvnproblem eller utmatting – i 15 år. Alle har tidlegare forsøkt behandling i helsesystemet.

Før behandlinga har pasientane rapportert om moderat til alvorleg depresjon og angst. Etter opphaldet i HIH har plagene vorte milde.

– Me ser ei markant endring, seier Tore Børtveit, psykologspesialist og leiar for angst- og depresjonbehandlinga i HIH.

Gode tilbakemeldingar

Børtveit presenterte funna frå dei to første gruppene førre veke. Då var mellom anna styremedlemer, finansiør Trond Mohn, varaordførar Frode Nygård og leiar for den felles styringsgruppa til HIH og Helse Bergen, Randi Louise Møgster, til stades. Etter presenteringar fekk HIH utdelt årets nyskaparpris av Sparebankstiftinga Hardanger.

Ei spørjeundersyning syner at pasientane stort sett er svært nøgde med tilbodet i HIH. På ein skala frå éin til fire får kvaliteten ei vurdering på 3,8 i snitt. På spørsmål om pasientane vil tilrå tilbodet til vener med liknande plager, får HIH full skår.

– Me tolkar dette som teikn på at dei er veldig nøgde, sa Børtveit.

– Allereie tilrådd

Pasientane har òg fått høve til å gi frie tilbakemeldingar til HIH. Éin svarar at behandlinga har vore betre enn all anna behandling som vedkommande har prøvd.

– Eg har klart å gjera ting eg ikkje har gjort på veldig lenge som betyr mykje. Eg synest det er enklare å gjera ting som er bra for meg, fordi eg forstår betre kvifor, svarar éin.

Éin kunne tenka seg fleire individuelle samtalar. Kvar pasient får i dag tilbod om éi individuell økt, elles føregår behandlinga i grupper.

Ein annan pasient skriv at behandlarane er eit fantastisk dyktig lag som ser kvar einskild.

– Det er ikkje noko vanskeleg legespråk. Ikkje noko press utover det som er naudsynt. Eg har allereie anbefalt det til nokon som treng eit opphald, skriv pasienten.

Det einaste som kunne ha gjort opphaldet betre, er ein kur mot covid-19, svarar éin.

– Eg er nesten litt sjokkert over at det kunne verka så bra, svarar ein annan.

Ein siste hadde aldri trudd at det skulle vera mogleg å få så gode resultat på så kort tid.

Trur på suksess

Børtveit seier den tidlege erfaringa tilseier at ein treffer relevante pasientar. Han viser til at dei får tydelege endringar i funksjonsnivået og i symptoma. Samstundes har ein enno ikkje langsiktige data å visa til. Ein vil ha meir relevante data etter tre månader, sa han.

– Dette kan ha ei vesentleg betydning for ei stor gruppe pasientar, og for samfunnet, sa Børtveit.

Han meiner òg at gruppedynamikken tilfører mykje. Pasientane hjelper og utfyller kvarandre: Dei bur i lag, vert kjende og støttar seg på einannan.

Psykolog og professor Gerd Kvale sa at ho trur HIH kjem til å få stor relevans både i og utanfor Noreg.

– Eg er takksam for å få ta del i eit slikt fellesskap i helsevesenet som er oppteke av å utvikla seg, kjenner til utfordringane me står overfor og vil bruka krefter på å forsøka å laga gode tenester, sa ho.