— Eg må no ha kome halvvegs til Tørvikbygd no!

— Eg må no ha kome halvvegs til Tørvikbygd, eg no! kjem det frå ro-apparatet.

Grete Vik er på trening for fyrste gong på treningssenteret, som opna i slutten av april. Vik har ikkje trent regelmessig tidlegare, men ho har vore flink til å gå turar i terrenget. Roapparatet er det andre treningsapparatet ho prøver. Det er ein del nytt å setja seg inn i, men det er kjekt å kunna trena i lag med andre, seier ho.

Per Eikeland, tidlegare rådmann og skulesjef i Jondal, har fleire år på baken – eller kanskje på beina – som lærar i kroppsøving og er til god hjelp på treninga. Han gjev råd og rettleiing, og ordnar dei rette innstillingane på apparatet.

— Sjå på tida du, Grete, det er nok til å byrja med, seier Eikeland.

— Viktig å trena

Ein gjeng på fire—fem karar byrja i haust å symja i lag i symjehallen. Då symjehallen vart stengd på grunn av pandemien, hoppa dei i fjorden. Det har dei sidan gjort kvar torsdag. No er planen å samla seg på treningssenteret kvar tysdag og torsdag, og fortsetja med bading i Hardangerfjorden torsdagane.

— Det har vorte så varmt i fjorden no at me treng knapt å varma oss opp med trening før me hiv oss uti, seier Eikeland.

At Vik er den einaste kvinna som trenar denne dagen gjer ingenting. Karane er kjekke og hjelpsame, og ho trur at fleire vil vera med etter kvart. Å trena innandørs var slett ikkje dumt, og Vik gler seg til å ta treningsrommet meir i bruk.

— Spesielt kjekt vert det å kunna gå ned her og trena om vinteren, seier Vik.

Eikeland meiner det er svært viktig å trena og vera i aktivitet, spesielt for dei som er komne godt opp i åra. Han har fått i oppgåve å motivera.

— Å bli støl er viktig. Om du ikkje vert støl, har du ikkje teke godt nok i. Det er slik me vert sterkare, seier Eikeland.

Drive på dugnad

Det nye treningssenteret heiter Jondal gym og ligg i fleirbrukshallen. Det er eigt og drive av Jondal idrettslag, og Gjermund Toreid leiar drifta. Til saman er dei 12 personar i leiargruppa som skal halda drifta i gang.

For rundt tre år sidan stilte Ullensvang kommune rommet til disposisjon i samband med planlegginga av fleirbrukshallen. Då vart det sett saman ei nemnd som skulle arbeida med eit eventuelt treningssenter i hallen. Det vart søkt om pengar frå ymse kjelder, og med god hjelp frå mellom anna Sparebankstiftinga Hardanger og Bremnes Seashore AS kom dei i mål.

To alternativ vart lagde fram på årsmøtet i idrettslaget: kommersiell drift og dugnad. Sistnemnde alternativ var det stor oppslutning om, og leiargruppa har no teke over roret.

— Alt i alt trur eg folk er interesserte i å trena og i å kunna bidra. Planen er å få flest mogleg i aktivitet. Folkehelse er viktig, seier Gjermund Toreid.

— Alle bidreg

Leiargruppa sit med mykje kunnskap. Nokre trenar ivrig, nokre er gode til å skru og andre igjen har peiling på IT og sosiale medium.

Det kostar 500 kroner i året å trena. Pengane går til vedlikehald av apparat og straum. Det er ikkje meininga at nokon skal tena pengar på drifta.

— Dei som har medlemskap, har dugnadsvakt to gongar i halvåret. Då lyt dei vera på senteret i to timar. Dugnadsvakta kan trena sjølv òg, og har ansvaret om nokon lurer på noko eller det trengst støvsuging, til dømes, seier Toreid.

At alle bidreg litt, gjer til at alle kjenner eigarskap til senteret. Toreid trur òg at prisen har ein del å seia. Dersom ein betalar mykje for å trena, gidd ein ikkje ta i eit tak på same måte og er gjerne mindre forsiktig med apparata.

— Alt vert lettare

Egil Strømme har sett fram til at treningssenteret skulle opna, og fekk tysdag endeleg sin fyrste dag med apparata. Han har tidlegare trent ein del gjennom LHL (Landsforeininga for hjarte- og lungesjuke) og tykkjer det er positivt at folk kan koma i form og få ein betre kvardag.

— Om ein er i god fysisk form, vert alt så mykje lettare, seier Strømme.

— Og ein treng ikkje vera redd for å gjera feil. Apparata er laga slik at det skal vera lett å skjøna, seier Eikeland.