– Eg håpar me slepp ei ny markering til neste år
Mange møtte fram for å syna solidaritet då eittårsdagen for det russiske angrepet på Ukraina vart markert i Norheimsund fredag.
Ukrainske Katerina Melnik var ein av deltakarane.
– Det var ei veldig fin markering, og eg er glad for at mange kom for å delta. Me frå Ukraina set stor pris på at folk synte solidaritet med oss, seier ho.
Ho tykkjer dagen er trist, men ser samstundes ein liten positiv ting med markeringa.
– Russland trudde at Ukraina berre kom til å halda ut i nokre få dagar. Eitt år seinare er Ukraina framleis eit uavhengig land, seier ho.
Melnik håpar ho slepp å oppleva at ein om eitt år markerer at det er to år sidan krigen starta.
– Før den tid håpar eg me kan feira at Ukraina har vunne krigen, seier ho.
Sjå fleire bilete frå markeringa her:
– Ukraina skal sigra!
Første del av markeringa gjekk føre seg i Norheimsund kyrkje. Der var det både synging av den ukrainske nasjonalsongen og tale av ordførar Torgeir Næss. Talen vart omsett til ukrainsk av Melnik.
– Russland har sidan Putin fekk makta, vist at dei er eit trugsmål mot naboane sine. Men Putin hadde ikkje rekna med at Vesten denne gongen skulle stå saman og støtta Ukraina. Dette er ein krig Russland ikkje kjem til å vinna. Dette er ein krig Ukraina ikkje kan tapa, og dei skal ikkje tapa. Dette er ein krig Vesten ikkje kan godta at Ukraina tapar. Ukraina skal sigra! sa Næss.
Etter talen var det kulturelle innslag. Anna Yurchenko song ein ukrainsk song, medan Iryna Tishchenko framførte dikt.
Deretter vart faklar kveikte og forsamlinga gjekk i tog til haldeplassen i Norheimsund.
På haldeplassen heldt Melnik ein appell, som har vore publisert i HF, før mannskoret Laudamus framførte ein song på ukrainsk.
– Tungt for mange
Grethe Galtung Johanessen i Grannehjelpa hadde prøvd å telja kor mange som var i kyrkja. Ho kom til kring 115 personar. Det var langt fleire nordmenn enn ukrainarar.
– Eg trur nok dette er ein vanskeleg dag for mange ukrainarar. Mange opplever det som tungt å vera saman med andre. Eg kjenner ukrainarar som har sagt at dei helst ville vera for seg sjølve på denne dagen, seier ho.
Arrangementet var organisert av Grannehjelpa, Kvam herad, KIA (Kristent Interkulturelt Arbeid) og Lions Club Norheimsund.
