Dyrka felles interesser
Sjølvberging og dyrking er i vinden, også i Kvam. Onsdag kveld møtte kring førti personar opp for å læra meir om temaet.
Gode soldagar mellom snømoking og skigåing har truleg sett fleire på tanken om å dyrka grønsaker. Å luka ugras, pitla sniglar og få skit under neglene. Ein draum for nokon, og ei mare for andre. Litt forkunnskap gjer truleg vegen til sjølvdyrka grønsaker i hagen lettare. Det håpar Tone Søndmør.
Søndmør er gründeren og gartnaren bak Kjøkkenhagen på Rykkje, som inviterte til dyrkekurs saman med Mathuset i Hardanger. Østerdølen flytta med mannen sin til Kvam sommaren 2020, etter å ha budd i Hallingdal rundt tretti år. På garden på Rykkje byrja ho med å byggja opp jorda den fyrste sesongen, og har sidan auka både dyrkingsareal og produksjon. No vert det dyrka på mellom eitt og to mål, og grønsaker vert selde til både verksemder og private.
– Blir du kvitt alt?
– Ja! Eg dyrkar ikkje til komposten, seier Søndmør.
Metoden ho jobbar etter, vert kalla regenerativ dyrking. Han handlar i hovudsak om å byggja opp og reparera naturlege krinsløp. I åkeren finst berre naturgjødsel, og ingen sprøytemiddel. At grønsakdyrkaren er oppteken av å nytta det som finst rundt oss, kom godt fram på kurset. Det gjeld å jobba mest mogleg på lag med naturen, meiner ho. Folk har kanskje ikkje tenkt over det, men både tang og urin skal vera gode greier, fortalde kurshaldaren.
Mykje av oppskrifta på eit godt resultat er god og næringsrik jord, meiner ho. For å få det, vart deltakarane rådde til å vera påpasseleg med det ein må vera påpasseleg med. Det gjeld både frø i komposten og «dei forbanna sniglane», for å nemna noko.
– Sniglar opplever eg at er det største problemet for dei som dyrkar på Vestlandet. Spesielt brunsniglar. Dei et rubb og rake. Der må ein ha ein strategi, sa Søndmør.
Sniglane var ikkje populære i rommet, og fleire fekk delt både tips, erfaringar og frustrasjon. At blautdyret har trolla til ein del avlingar i området dei siste åra, var det ikkje tvil om. Søndmør sa det frigjerande ærleg: «Det er rett og slett eit sant helvete med dei sniglane.» Nær sagt alle nikka og sa seg einige.
HF gjer merksam på at journalisten sjølv betala for og deltok på kurset. Red.
