Dyrare på Vinmonopolet frå 1. mai

Frå 1. mai aukar prisane på Vinmonopolet med 2,4 prosent. Svekking av den norske krona opp mot dollar og euro er ei av årsakene.

Sidan førre prisauke i januar har koronakrisa vore med på å auke både dollar- og eurokursen mykje, skriv Nettavisen. Dermed blir det dyrare å kjøpe inn med norsk valuta. Svekt kronekurs gjer at dei rundt 500 leverandørane til Vinmonopolet varslar prisauke.

– Basisutvalet vårt får ein prisauke på 2,3 prosent, medan bestillingsutvalet vårt aukar i pris med 2,5 prosent. Gjennomsnittleg auke er 2,4 prosent, seier kommunikasjonssjef Jens Nordahl i Vinmonopolet.

Nordahl meiner dette er ein relativt normal prisauke, og om lag som ein må vente når norsk krone svekkjer seg. Han meiner òg at prisveksten er mindre enn han kunne ha vore sidan fleire europeiske vinprodusentar no sit med større lager med vin og har måtta setje ned prisane.

1. januar var sist gong prisane auka, då med 1,5 prosent sidan førre prisendring 1. september 2019.

(©NPK)