Dykkarar fann mykje plast i sjøen

Rådet kom etter aksjonen i helga der dykkarar frå Søgne Dykkerklubb og Os Dykkeklubb fann plast i fjorden.

– Det ligg veldig mykje plast utanfor elveleiet. Plasten har byrja fragmentera seg. Det må vekk, og det hastar sidan det har byrja gå i oppløysing, seier Kenneth Bruvik, styreleiar i Framtidshavet.

Søndag la Jan Erik Moss Soltveit, ansvarleg for miljødykka Os Dykkeklubb deltek i, ut melding i facebookgruppa Kvardagsprat i Kvam. Han har lagt ut ei skisse av eit avgrensa område der klubben skal ha dokumentert at det ligg mykje plast. Han skriv òg at Os Dykkeklubb frårår all fangst i og nær området.

Det fekk Heidi E. Ørjansen, leiar i eining for plan- og byggjesak og for tida i tillegg konstituert samfunns- og utviklingssjef i Kvam herad, til å dela informasjonen på nettstaden til heradet.

– Eg har eigentleg ikkje fagleg kunnskap om dette, men det er gjort etter råd frå aksjonen, seier Ørjansen.

– Trygt å eta sjømat

Heradet har vore i kontakt med Statsforvaltaren for å finna ut korleis saka skal handterast. Ørjansen veit ikkje når ho kan venta svar.

– Eg har ikkje kjennskap til kor skadeleg plasten er for fisken, men poenget er vel at ein skal unngå å stå rett over kjelda og fiska, seier Ørjansen.

Ragnar Ludvig Olsen, professor ved Norges fiskerihøgskole ved Universitetet i Tromsø (UiT), seier at det kan konkluderast med at sjømat er trygt å eta. Det kjem fram i ein artikkel frå 2020 på nettstaden til UiT. Olsen har saman med ein kollega gått gjennom forskingskunnskap om mikroplast i fisk og sjømat. I 2016 vart det publisert ein studie av plast i torsk. Ifylgje UiT-artikkelen hadde ni av 300 torskar fanga langs norskekysten plast i magen.

– Det kan godt henda at fleire fisk får i seg plast, men det meste går ut igjen via fordøyinga, sa Olsen til UiT.

– Dialog med kommunen

Som HF skreiv nyleg, skal mange rundballar ha hamna i fjorden etter ein flaum i 2019. Det er ikkje kjent om det var plast frå desse som vart funnen i helga.

Ifylgje Bruvik ligg plasten i mudderet, og han er vanskeleg å få opp. Når dykkarane dreg i plasten, virvlar mudderet opp og det vert dårleg sikt, forklarer Soltveit. Det gjer ryddejobben vanskeleg.

Les også:

Ifylgje dykkarane Bruvik har snakka med, er plasten spreidd utover heile botnen. Det er viktig å finna ei god løysing for å få fjerna alt, seier han.

– I Noreg seier regelverket at det er ureinaren som må rydda opp etter seg, men i denne saka tenkjer eg me må ha ein diskusjon med kommunen og dei rette instansane for å få det vekk, seier Bruvik.

Han er oppteken av at dette ikkje er noko som er mista med vilje, men når det fyrst skjer, må ein finna ein måte å rydda opp på.

Han seier at det er viktig å få kartlagt problemet og finna ein måte å henta plasten opp på. Det er uheldig for det marine livet i sjøen, meiner han.

Les også: