Dugnadsgjeng ordnar golv
Det nye golvbelegget i Folkets Hus i Ålvik vart lagt denne veka.
Eigentleg er det eit handikaptoalett som står på planen for dugnadsgjengen i Ålvik. Dei sju-åtte «guttane», som dei kallar seg sjølve, måtte ta pause i arbeidet for å byta golv.
– Det var så dårleg at me måtte ta det fyrst, seier Frode Wollestad, formann for «guttane».
Furugolvet var frå 1947, seier Wollestad. Sponsorstønad står for det meste av finansieringa. Mellom anna har Sparebanken Vest gjeve 50.000 kroner, Fana Sparebank 10.000 kroner og Kvam herad 15.000 kroner. I tillegg har Folkets Hus brukt eigne midlar og har fått ei minnegåve som er brukt.
La golvet gratis
Arbeidet tok til førre måndag, etter Ålvikrock hadde hatt sitt arrangement i huset. Eit taktisk val.
– Ålvikrock er ein skikkeleg stor fest, og då er det lett at det vert søl på golvet. Alkohol og brus vert ein god sukkerlake, så ein heng fast i golvet nokre dagar, seier Wollestad.
Arbeidet starta med å lima fast sponplater til det gamle golvet, og så skru dei fast. Yngve Johansen starta i sommar bedrifta Johansen Gulv og Flis i Norheimsund. Han er utdanna målar og golvleggjar, og tilbaud seg å leggja golvbelegget gratis.
– Han hadde eigentleg ikkje noko val, seier Kåre Johnny Flotve, styreleiar i Folkets hus og svigerfar til Johansen.
Johansen arbeider eigentleg offshore, men har ein draum om å opparbeida seg nok kundar til å jobba fulltid for enkeltpersonføretaket. Golvleggjaren kjem frå Odda, men flytta til Norheimsund med sambuaren for to år sidan. Å hjelpa til med golvet i Folkets Hus er eit forsøk på å verta kjend i nærmiljøet, seier Johansen.
– Det er ingen her som kjenner meg så godt. Det er mange innom her, så då tenkte eg det var ein fin måte å koma i kontakt med andre på, seier Johansen.
Skal vera klart neste veke
Belegget har han bruka to dagar på å leggja. Måndag starta han med å lima det fast, før det vart frest og sveisa dagen etter. Johansen er nøgd med resultatet, og alt har gått etter planen. Då HF vitja Folkets Hus tysdag, fortalde Wollestad at det allereie hadde gått med 160 arbeidstimar. Neste veke skal storsalen vera klar til bruk, etter å ha vore stengd i to veker. Wollestad meiner Johansen har gjort ein fantastisk jobb.
Gråfargen på golvet er nøye gjennomtenkt.
– Det er fargehandelen og kona mi som har bestemt, seier Wollestad.
Fargen skulle vera praktisk, slik at ikkje skiten viser så godt. Dessutan måtte han ikkje vera for lys, slik golvet i kjellaren er. Dugnadsgjengen lærte av erfaringa frå underetasjen, og eit einstemmig styre valde det mørkaste alternativet.
Alle materialar er handla hos lokale bedrifter. Ingenting er bestilt på internett, seier Wollestad. Torstein Aksnes frå Fargerike Norheimsund har hjelpt til med å velja type belegg og farge til dette og framtidige prosjekt. Veggane òg skal nemleg byta farge etter kvart.
– Me vert ikkje arbeidslause
Fyrst skal «guttane» fullføra prosjektet med å laga handikaptoalett, ordna dei andre toaletta og inngangspartiet. Taket i inngangen skal fiksast og få nytt lys, og det skal byggjast ein serveringsdisk i gangen utanfor storsalen. Framdriftsplanen er klar. I alle fall inne i hovudet til Wollestad. På planen står også ein handikapheis som skal gå rett inn til storsalen, men det arbeidet er sett vekk til fagfolk.
– Me vert ikkje arbeidslause. Huset held oss i aktivitet. Oppgåvene tek aldri slutt. Me får ta dei enkle oppgåvene som er lette å få til, som flikking og måling. Prosjekta må ikkje bli for store, seier Wollestad.
Her kan du sjå «guttane» sine eigne bilete frå prosjektet:
«Guttane» har vore i aksjon med ymse prosjekt tidlegare. Det kan du lesa meir om her:
