Dugnad og gåver gav ny uteplass
Små og store smilte om kapp då Sjydnahaugen barnehage onsdag hadde offisiell opning av ein ny trelavvo ved Kvam ungdomsskule.
Ingvild Rykkje og Egle Dedinaite er barne- og ungdomsarbeidar i barnehage. Dei to har hatt ansvaret for å organisera arbeidet.
Rykkje fortel at lavvoen har kosta nokre få tusenlappar. Det skuldast at den er bygd på dugnad av tilsette og foreldre, og at både tømmeret og materialane i fundamentet er gåver.
Fleire foreldre arbeider i lokale entreprenørverksemder og har lånt utstyr frå arbeidsgjevarane til å utføra grunnarbeidet. Til saman er det brukt om lag 200 dugnadstimar på lavvoen.
– Barnehagen har brukt litt pengar på spikar, pleksiglas og eit gjerde i skogen bak lavvoen. Resten er gåver. Skulle me betalt for alle materialane og arbeidet, tippar eg lavvoen hadde kosta minst 100.000 kroner, seier Rykkje.
– Ein «asfaltbarnehage»
Sjydnahaugen barnehage er omringa av asfalt og andre bygg. Difor har den ifølgje Rykkje ofte vore omtala som ein «asfaltbarnehage». Barnehagen har eit uteområde i Svartaskogen, men avstanden har gjort at det har vorte mindre og mindre brukt.
– Me har leita etter eit område som ligg nærare barnehagen. Det fann me her, fortel Rykkje.
Barnehagen skal ikkje berre bruka sjølve lavvoen. Skogen som ligg like ved, er òg viktig.
– For borna er det mykje lærdom i å vera ute og boltra seg i naturen. Dei finn ut korleis ting fungerer og kva i naturen me kan bruka. Dessutan er frisk luft veldig bra for born, seier Rykkje.
Arkitekt klipte snora
Arbeidet med lavvoen starta våren 2021, og bygget har vore i bruk sidan hausten 2022.
– Me venta med den offisielle opninga fordi me ville etablera området, slik at borna vart litt kjende med det før opninga. Og så ville me ha opninga når det var vår og fint vêr, seier Rykkje.
Opninga vart markert med kaker og saft. Sivilingeniør Arild Kvittingen har teikna lavvoen. Han klipte snora.
Rykkje seier at fleire har vore skeptiske til å plassera lavvoen så nær ungdomsskulen. Årsaka er at ein fryktar hærverk.
– Me har hengelås på døra. Nokon har allereie prøvd å koma seg inn i lavvoen utan hell. Me håpar at ungdomane kan respektera alt arbeidet me har lagt ned i lavvoen, og lata den stå, seier ho.
