Du må ta tak i måseplaga no

Om du har tenkt å gjere tiltak for å sleppe bråkete måsar, så må du gjere det no. Når dei først har starta reirbygginga, må du late dei vere i fred.

Ellen Hambro er direktør i Miljødirektoratet. Ho er klar på at det er ulovleg å forstyrre måsen i hekkeperioden. Ho minner også om at fleire måsesortar, slik som krykkje, hettemåse og fiskemåse, faktisk er i tilbakegang her i landet, og at dei fleste måseartane slit med å produsere ungar.

– Måsar brukar ofte same hekkeplass over fleire år. Hadde du problem med måsar i fjor, kan du gjere førebyggjande tiltak slik at måsane finn seg ein annan stad å hekke. Dette må skje i god tid før hekkesesongen, noko som betyr at mange, spesielt sør i landet, begynner å få dårleg tid, seier ho.

Her er råda frå Miljødirektoratet:

* Ein kan leggje til rette for hekking andre stader ved å byggje måseplattformer.

* Ikkje mat måsane – rydd opp etter deg og hald uteområde på restaurantar ryddig, slik at måsane ikkje ven seg til stader der mat er lett tilgjengeleg.

* Ein kan setje opp forstyrrande piggar på typiske sitjeplassar, på gesimsar og takutstikk der fuglane ofte sit for å observere.

* Ein kan spenne trådar oppe på taket med mellomrom på 30 centimeter og 30 centimeter opp frå taket før hekking, men ikkje bruk nett som fuglane kan setje seg fast i.

* Varier med ulike typar fugleskremsel før hekking.

* Så fort måsane har starta reirbygginga, er det forbode å fjerne reira eller forstyrre dei på andre måtar. Å fjerne reir eller egg blir rekna som skadefelling, og for å gjere det må ein søkje om løyve.