Dryge doningar og begeistra blikk
Augo gjekk både høgt og lågt hjå små og store då Kvam Veteranvogn Klubb inviterte til Wings & Wheels Hardanger laurdag.
Nokre var mest interesserte i å få sitja på med veteranbrannbilen, medan andre gjekk time etter time og beundra blankpolerte køyretøy i alle slags formar.
Vêret viste seg frå si beste side. Regnet fredag var berre for å vaska vegane, seier arrangør Asbjørn Honningsvåg.
Han er formann i Kvam Veteranvogn Klubb, som står bak Wings & Wheels Hardanger saman med Hardanger Mikroflyklubb, Kvam Motorsportklubb og Hardanger fartøyvernsenter.
Telefonen hans har knapt lege stille heile veka. Då HF prata med han fredag ettermiddag, såg han mest fram til å bli ferdig med heile arrangementet, men han snudde fort.
— Eg ser fram til at det vert ein kjekk dag, og håpar det kjem mykje folk, sa Honningsvåg.
Det gjorde det.
Sjå biletserie her:
Småbilar frå Dinkytoys
Robert Laulier frå Paris var på plass klokka halv seks laurdag morgon. Han selde småbilar frå verkstaden til Kvam Auto. Småbilar har han samla på heile livet. Han hadde ein pause på ti år, men så vakna interessa att i franskmannen. No dreg han rundt på ulike treff for å selja dei.
Dei eldste bilane er frå 1947. Det er originale bilar frå merket Dinkytoys. Dei byrja produsera småbilar i 1945 eller 1946, fortel Laulier. Det var etterkrigstid og låg produksjon på den tida.
Den dyraste bilen laurdag er ein hippiebuss frå 1968. Prisen ligg på rundt 3.000 kroner.
– Det er kultur
Honningsvåg trur folk har vore sugne på at det skjer noko. I tida med korona var det knapt eit treff å finna for motorinteresserte. Kor mange utstillarar som dukka opp, veit han ikkje. Han tippar over 300, kanskje 400.
Det som starta som ein vill idé for nokre år sidan, har vist seg å fanga interesse både hjå lokale og tilreisande. I fjor var det til dømes utstillarar frå Setesdalen og Møre, minnest Honningsvåg.
– Me vil berre samla folk, ha det moro og sjå på andre sine bilar. Det var grunntanken. Å ha noko som skjer lokalt. Det er jo kultur, dette, seier Honningsvåg.
Allereie i 2019 hadde arrangementet vakse seg dobbelt så stort som fyrste gongen i 2017. Folk er veldig godt nøgde med samlinga, fortel han.
– Flyoppvisninga til Fosso er jo ein slager. Alle synest det er veldig kjekt. Og veteran-brannbilen som køyrer turar, seier Honningsvåg.
Stigar med stil
Dagens sjåfør på veteranbrannbilen var Jostein Småbrekke. Han har vore medlem i veteranvognklubben i vel 30 år. Han fortel at brannbilen, som er eigd av klubben, er årsaka til at klubben i si tid vart stifta. Bilen stod lagra i ein rubbhall på Sandven, men så fekk nokon høyra at Bergen Veteranvogn Klubb var på jakt etter han.
– Og då fekk me litt panikk, veit du, seier Småbrekke.
Klubben vart etablert, og etter litt forhandlingar med kommunen overtok han ansvaret for klenodiet. Motoren vart overhala og bilen lakkert. Dessutan fekk klubben ordna nye stigar til brannbilen. Og stigane er ikkje som andre stigar.
– Då kongeskipet var på fartøyvernsenteret for å få ny mast, hadde nokon fått tak i ei svær mastefuru til det. Ein kar fekk hand som materialane som var til overs, og ein lokal møbelsnikkar, laga nye stigar til bilen, fortel Småbrekke.
Surt salt
Knut Revheim kom køyrande frå Osterøy i ei Volvo 240 stasjonsvogn. Som leigesjåfør denne gongen, men han har bilar sjølv òg. Han seier det er eit godt miljø for bilar på Osterøy, men ikkje alle er registrerte og moglege å sjå langs vegen. Laurdag var dei fem bilar som tok turen.
Bilane vert for lite brukt, meiner Revheim. Det skuldast mest at salting av vegane byrjar tidleg og sluttar seint.
– Då lyt me ha dei inne, seier han.
Sjølv vaks Revheim opp med ein Volvo duett. Han kjøpte bilen då han fekk lappen i 1970. Då var bilen tre år gamal. Bilen har han teke godt vare på, og han er framleis på vegen, fortel han.
Militær interesse
Kvemming Tore Byrkjeland og brørne hans har lenge hatt interesse for militære køyretøy. Interessa er ikkje så stor her i distriktet, men ho veks etter kvart som ein reiser sørover eller austover, fortel han.
– Korleis starta interessa?
– Då me var små, var det ein kar i Tørvikbygd som hadde ein slik jeep. Det ville me òg ha, fortel Byrkjeland.
Det enda med at dei kjøpte kvar sin, og fleire har det vorte. Ein del av bilane er kjøpte på auksjonar på slutten av 1980-talet og 1990-talet.
Ein av bilane han stilte ut laurdag, var ei GMC verkstadsvogn. Det amerikanske forsvaret hadde bilen under krigen, og så fekk Noreg han som ein del av Marshall-hjelpa i 1951.
Til neste år har han ein plan om å arrangera eit eige treff for militærbilar i Kvam.
To sjøfly i minus
Mellom anna «burnout» stod på programmet, noko odøren i vinden fortalde monaleg fleire enn dei som var til stades. I Steinsdalen fekk høgdeglade tilbod om å sjå Kvam frå lufta. Hardanger Mikroflyklubb hadde besøkjande frå både Os, Stord, Eidfjord og Manger. Eit helikopter syrgde for sightseeinga.
Tidlegare har også to sjøfly som hatt sightseeing-tilbod under arrangementet. Det har vore svært populært, men slik vart det ikkje i år. Begge havarerte i løpet av sommaren, opplyser Honningsvåg.
Sjå bilete frå Håkon Fosso sitt flyshow her:
HF gjer merksam på at far til artikkelforfattaren er styrelem i Kvam Veteranvogn Klubb. Red.
