Drøymer om å leggja ein kabel
Kan luftspennet mellom Belsnes og Ljones erstattast med kabel i sjøen?
Den vurderinga ynskjer heradsstyret i Kvam at Statnett SF gjer i samband med oppgraderinga av kraftlina frå Blåfalli til Samnanger.
Framlegget kom frå Odd Valland Bovim (MDG) då dei folkevalde uttala seg om meldinga frå Statnett om den ynskte spenningsoppgraderinga til 420 kilovolt. Bovim meiner at det av omsyn til både natur og estetikk er grunn til å få kabelløysinga vurdert.
– Tida for dei store luftspenna bør i stor grad vera forbi, sa Bovim.
– Også kabel gjev inngrep
Varaordførar Frode Nygård (Frp) røysta ikkje mot, men minte om at også kabel inneber inngrep i naturen på båe sider av fjorden. Han ser ikkje noko gale i å få slike såkalla muffeanlegg, som ligg i overgangen mellom luftspenn og kabel, illustrerte.
– Då får folk sett korleis det ser ut. Så kan folk gjera seg opp ei meining når lina skal på høyring, sa Nygård.
Fråsegna frå kvemmingane inneber ikkje harde knyttneveslag i bordet. Dei tek meldinga til vitande, og nøyer seg med å krevja at den gamle kraftlina vert riven når den nye lina er i drift. Dei omtalar heller ikkje inngrepa andre stader i Hardanger, til dømes i Jondal.
Ottast vidare bruk
Både kabel og ikkje minst riving vart tema også då prosjektdirektør Kenneth Teigenes og advokat Steinar Parelius i Statnett orienterte politikarane om saka i heradsstyremøtet 14. november.
Nygård tok opp otten for at dagens linetrasé frå Mødal til Ljones skal verta nytta til nye føremål av Eviny. Otten er basert på folkesnakk. Om det er noko i snakket, inneber det at kvemmingane ikkje får heile belastinga presentert samla, påpeika Nygård.
Teigenes svara at Statnett søkjer om konsesjon for både å byggja ny line og riva den gamle, men at han er klar over at Eviny – eller BKK, som han omtala selskapet som – kan tenkjast å ynskja å nytta den gamle lina. I så fall må selskapet søkja om konsesjon for det.
Nygård meiner at Statnett bør utfordra Eviny for å få alle fakta på bordet.
– Det har eg full forståing for, og det skal eg lova deg at me gjer, sa Teigenes.
Han opplyste at dei nye mastene frå Ljones til Mødal kan verta tre til fem meter høgare enn dagens master. Vidare frå Mødal mot vest er lina allereie lagd til rette for 420 kilovolt, som del av leidningen frå Simadal til Samnanger.
Les også:
