Droppar konferanse i 2024
Hardangerrådet skipar ikkje til Hardangerkonferansen i år. Rådet skal bruka året til å finna ut kva det skal vera i framtida.
Det avgjorde rådet i møtet i Norheimsund 21. mars. Regionrådet vil i staden skipa til ei andre utgåve av Hardingtinget i år, som ei oppfylging av den fyrste i februar.
Relativt ferske rådsordførar Timo Knoch frå Eidfjord opplyser at årsaka til avlysinga er at rådet for tida har berre éin person i administrasjonen, etter at Jostein Eitrheim vart pensjonist i vinter.
– Det er eit ganske omfattande arbeid å arrangera konferansen, seier Knoch til HF.
Mogelege partnarar
Han opplyser at både Voss herad og Samnanger kommune har gjeve signal om at dei kan vera interesserte i utvida samarbeid med Hardangerrådet. Difor vart båe inviterte til den fyrste utgåva av Hardingtinget i februar.
Om det er snakk om å verta medlem eller andre former for samrøre, er uvisst enno, fortel Knoch. Diskusjonen vil halda fram når den andre utgåva av Hardingtinget vert skipa til i haust.
– Me må få Hardangerrådet til å fungera betre enn det har gjort dei siste åra. Me har alt å tena på å ha eit sterkt regionråd, seier Knoch.
Bakgrunnen for initiativet frå Voss, som gjekk ut av Hardangerrådet for nokre få år sidan, er eit vedtak i heradsstyret der i desember. Politikarane bad om at det vert sett i gang ein prosess med mål om at Voss igjen vert medlem av eit interkommunalt politisk råd. «Samarbeid gjennom regionale organ er ein viktig måte å ivareta vår rolla som regionsenter. Råda kan spele ei viktig rolle som koordineringsorgan i saker med felles regionale interesser, og dei kan ha ei viktig rolle som bindeledd mellom kommunane og fylkeskommune», heiter det i vedtaket.
Dagleg drift fyrst
Berre to søkte på jobben som dagleg leiar etter Eitrheim i vinter. Stillinga vil ikkje verta lyst ut att før rådet har avklara korleis framtida til organisasjonen skal vera. Inntil då vert dagleg drift og ikkje utvikling prioriterte oppgåver, fortel Knoch.
Torsdag og fredag var regionrådet på Tysnes, mellom anna for å ha fellesmøte med Sunnhordlandsrådet. Føremålet er å drøfta sams utfordringar og mogelege samarbeid, men samanslåing av råda er ikkje noko tema, fortel rådsordføraren.
Knoch og kollegaene i rådet fekk fredag ei digital presentasjon av drifta av Helgelandsrådet, mellom anna som eit grunnlag for å vurdera eige ambisjonsnivå og eiga organisering.
