Droppar gangveg for alle til hovudinngangen til ny skule
Tilkoma til hovudinngangen til Kvam vidaregåande skule vert truleg ikkje universelt forma.
Årsaka er at det ikkje er mogeleg, visstnok mellom anna som fylgje av utfallet av makeskifte i området. Framlegget frå utbyggjaren er å byte ut den planlagde, slangeforma gangvegen med eit stigingsforhold på 1:15 med ein skrånande veg med stigingsforhold på 1:10. Løysinga, som vil forenkla snøryddinga, er akseptert av fylkeskommunen.
Det går fram av eit møte om endringa mellom Kvam herad, fylkeskommunen, Veidekke Entreprenør AS og Norconsult AS 25. juni. Her vart det drøfta om endringa er søknadspliktig. Utbyggjaren argumenterte med at terrenget i området ikkje er menneskeskapa, noko som er ein føresetnad for krav om universell utforming.
Det har rådmannen konkludert med at ho er. Ho meiner det er ei vesentleg endring at gangvegen frå fylkesveg 49 til inngangsdøra ikkje lenger er universelt forma. Søknaden må vera godt grunngjeven, og han må truleg handsamast av råd for menneske med nedsett funksjonsnedsetjing etter sommaren. Neste møte er 17. september. Planen er å starta arbeidet med gangvegen i oktober, ifylgje referatet.
Hovudinngangen til skulen på nordsida vil framleis vera universelt forma. Der har utbyggjaren flytta på fleire parkeringsplassar for funksjonshemma for å få dei nærare inngangen og betra stigingstilhøva.
