Droppa opptrening og syklar Noreg på langs

Studentane Lars Kristian Flaat, Fredrik Fossland, Morten Haugstad, Magnus Natvig, Tobias Håland og Martin Hals Johannesen syklar Noreg på langs. Sveinung Kvamsdal Sveen var, etter avtale, «berre» med til Trondheim.

– Etter turen skal sykkelen kastast i sjøen. Den skal senkast. Eg skal aldri sykla igjen, seier Fossland på tull.

Tak over hovudet

Frå måndag til tysdag overnatta syklistane i huset til Torleif Lyngset i Vikøy i Kvam. Håland er barndomskamerat med det eine barnebarnet til Lyngset, Vetle Lyngset Holme.

– Eg spurde om eit par kompisar kunne overnatta i huset, utan å nemna noko om syklinga. Det vert artig å høyra reaksjonen til bestefar når han oppdagar at overnattingsgjestene syklar Noreg på langs, seier Holme.

Studentane har sove mange ulike plassar undervegs, og ikkje berre hjå vener og familie. Natt til onsdag skulle gutane eigentleg sova i telt, men så ringde Johannessen til Røldal Hyttegrend Camping & Caravan. Campingplassen gav syklistane ei tv-stove å sova i. Johannessen fortel også om ei anna type overnatting.

– På ein bensinstasjon mellom Alta og Nordkapp, i Skaidi, spurde me ei jente som jobba der om overnattingsplass. Ho svara: «Eg trur pappa har ein lavvo.»

Johannessen kom i kontakt med far til jenta på bensinstasjonen. Han var same og bortreist, men syklistane fekk låna lavvoen hans. Seinare på kvelden kom andre med ved til lavvoen. Slike opplevingar er ikkje kvardagskost for syklistane, men kvardagskost byrjar verta ei stund sidan no.

Nedover og oppover

– Me prøver å få i oss mest mogleg energirik kost. Med lange dagar på sykkelsetet og lite næring merkar ein det på kroppen. Eg har hatt litt problem med magen, fortel Haugstad.

Fleire av studentane har slite med skadar undervegs. Flaat fortel at fleire difor har tenkt på å avbryta.

– Nokre av oss har vore innom godterihylla på apoteket, poengterer Johannessen.

Det har vorte ein del uhell. Kvar gong nokon fell, sørgjer ein av gutane for at det vert dokumentert. Studentane humrar idet dei dreg fram eit eksempel: Det var på ein regnfull etappe, og gutane oppdaga eit hòl i vegen. Johannessen bremsa ikkje og stupte dermed over styret i høg fart.

– I tillegg står Johannessen for sju av tolv punkteringar på turen, påpeikar Haugstad.

Gutane har vore innom XXL-verkstader fleire gonger undervegs. Ikkje alle hadde hatt sykkelen på sørvis før avreise.

Kameratane sit uansett att med mange gode opplevingar. Håland framhevar natur, møte med menneske og samhaldet i gruppa som høgdepunkt.

– Folk har vore glade for å sjå oss og teke godt imot oss, seier Haugstad.

Hjelper og vert hjelpte

– Korleis oppstod ideen om å sykla frå Nordkapp til Lindesnes?

– Me er ein gjeng som er glad i å sykla. Tidlegare har me delteke på sykkelrittet Kristiansand–Hovden. Etter det kom tanken om å sykla Noreg på langs. Det har stått på gjeremålslista til fleire, fortel Johannessen.

Før syklistane la ut på turen, fekk gjengen tak i sponsorar. Johannessen fortel at studentane tok kontakt med KRIK, som sa seg villig til å sponsa delar av turen mot at dei samla inn pengar til innsamlingsprosjektet Idrett krysser grenser. Pengane går til vanskelegstilte born i Kambodsja, Brasil, Bolivia og Ecuador. Sponsorane kan anten yta ein fast sum eller ein sum per kilometer, liknande ordninga til Misjonsløpet på Framnes.

I tillegg har verksemder sponsa gutane med drakter og mat.

Mål i sikte

Haugstad poengterer at kompisgjengen har fått større respekt for andre syklistar som har gjennomført den same turen. Han trur mange tenkjer på turen berre som lang og ikkje noko meir. Ein må ta tida til hjelp.

– Det går ut over både psyken og fysikken. Ein merkar etter kvart at ein er lei syklinga og dårleg vêr. Litt i tillegg til folka, seier Haugstad.

På den andre sida er fleire av studentane einige om at dei ynskjer ein ny langtur. Ein eventuell ny tur vert i så fall i varmare strok, fortel syklistane. Håland har på si side eit anna forslag.

– Me har snakka om å sykla Finland på langs i mummidrakter, seier han spøkjefullt.

Studentane har lagt mange kilometer bak seg. I snitt har kvar etappe vore i underkant av 20 mil. Då HF vitja syklistane tysdag, stod tre etappar att: Vikøy–Røldal, Røldal–Hovden og til slutt den lengste etappen på rundt 25 mil, Hovden–Lindesnes.

Målgang ved Lindesnes Fyr skjer etter planen rundt klokka 18.30 torsdag 4. august. Då har studentane totalt sykla over 300 mil.