– Dropp formelt organ!
Politikarane ville ha ei hand på rattet gjennom ei politisk gruppe for å sikra framdrift i skredsikringsprosjekta. Fylkesdirektøren rår frå løysinga.
Etter eit framlegg frå Sigrid Brattabø Handegard (Sp) vedtok fylkesutvalet i september å oppretta «ei politisk styringsgruppe mellom fylkeskommunen og vertskommunane». Føremålet var å sikra «nødvendig planframdrift» i dei to store skredsikringsprosjekta på fylkesveg 49 i Kvam og Ullensvang.
Bakteppet for utspelet, som hausta kritikk berre frå KrF, var avgjerda til regjeringa om å satsa på vegen via Odda, Jondal og Kvam som «arm» frå E134 til Bergen.
Formell ramme
Dersom ei slik gruppe skal ha makt til å uttala seg og fylgja opp arbeidet, krevst ei form for formell innramming. Etter hans syn høver eit såkalla interkommunalt politisk råd best til føremålet. Eit slikt råd, til liks med andre interkommunale organ, må retta seg etter reglane for folkevalde organ, med mellom anna opne møte og møteprotokollar.
Eit anna alternativ er eit uformelt samarbeid der private aktørar får delta i møte om sakene. Men, påpeikar fylkesdirektøren, den nye kommunelova skil skarpt mellom politikk og administrasjon. Dei kan ikkje møtast på uformelle arenaer.
– Ei samanblanding kan få uheldige konsekvensar for ei ryddig og open handtering av saker. Det er mogelegheit for å diskutera faglege tema i slike uformelle møte, men vedtaka skal gjerast i den enkelte fylkeskommune eller kommune. Det skal ikkje gå ut formelle brev eller skriftlege meiningsytringar frå ein slik arena.
– Dersom fylkestinget vedtek å oppretta ei gruppe, gjev instruksar om å sikra framdrift i eit prosjekt og vel medlemer, vil det ikkje lenger vera tale om eit uformelt samarbeid. Då må samarbeidet bli innretta som eit interkommunalt samarbeid i tråd med kommunelova, skriv fylkesdirektøren.
– Dropp det
Hans råd, i ei sak som vert lagd fram for hovudutval for samferdsle og mobilitet 19. november, er å lata vera å oppretta eit formelt organ for oppfylging av skredsikringsprosjekta på fylkesveg 49. Det trengst ikkje for å samordna politiske synspunkt på tvers av kommunane.
– Arbeidet må skje i tett dialog med fylkeskommunen både på administrativt og politisk nivå. Fylkeskommunen har i dette arbeidet ansvar for å vareta også interessene til kommunane og avvega ulike interesser, skriv fylkesdirektøren.
Han oppmodar om at dei folkevalde gjer «politiske avklaringar» og fremjar framlegg i politiske møte undervegs i planprosessen.
Handegard seier til HF at hennar intensjon var å få betre samhandling mellom planleggjarane og kommunane, slik at ein unngår å kasta bort tid på å «kasta ball» og får betre framdrift. Allereie no har det teke altfor lang tid å regulera tunnelane, meiner ho.
– Eg ser at det juridiske vert problematisert. Eg er ikkje så oppteken av kva gruppa heiter, men av at me får et godt samarbeid og minst mogeleg byråkrati. Ein må finna ei praktisk løysing for å koma vidare, seier ho.
I gang med dokument
Han opplyser at Statens vegvesen er i ferd med å utarbeida eit styringsdokument for prosessen med vidare arbeid med tiltak langs «armen», alt leia av ei styringsgruppe. Nærare mandat og framdriftsplan finst ikkje enno. Regjeringa har gjeve vegvesenet oppdraget med å setja i gang arbeidet med ein utviklingsstrategi, i samarbeid med fylkeskommunen.
Etter avgjerda til regjeringa møtte fylkesordføraren mellom andre ordførarane i dei råka kommunane og lobbyorganisasjonar for å drøfta vidare arbeid. Ein konklusjon, ifylgje sakspapira, var at det skal opprettast eit politisk kontaktutval leia av fylkesordføraren.
Fylkesutvalet drøftar saka 25. november.
