Drøftar reglar for omstridd næringsfond

Mindretalet tapa kampen for lokale næringsfond i Ullensvang i fjor. No kjem føringane for bruken av fondet til politisk handsaming.

Fleire, mellom andre jondølingar, tok til orde for lokalt innretta næringsfond i fjor, i tråd med intensjonsavtalen om kommunesamanslåinga. Fleirtalet valde etter ein lang debatt å ha berre eitt fond utan lokale særreglar for heile kommunen.

Framlegget til reglar for både næringsfondet og vedtekter for vekst- og strategifondet og konsesjonsavgiftsfondet vert drøfta av utval for samfunn, plan og næring onsdag. Seinare skal formannskapet drøfta dei, før kommunestyret gjer endeleg vedtak.

Næringsfondet skal årleg tilførast tre millionar kroner frå konsesjonsavgiftene. Ifølgje vedtaket i fellesnemnda skal pengane i næringsfondet koma ulike næringar og verksemder til gode: landbruk, fruktdyrking, reiseliv, industri og små og mellomstore verksemder.

Ymse kriterium

Ifølgje framlegget til reglar må tilskota prioriterast i samsvar med kommunale planar og næringsstrategiar.

Kriteria som ligg til grunn for vurderinga, er sysselsetjing, prosjektøkonomi, samarbeidspotensial, innovasjon, omdømebygging, miljø og folkehelse og disponible kroner. Ein vil ikkje yta tilskot til mellom anna ordinær drift, gjeldssanering, eigedomskjøp og tiltak som er sette i gang. Dessutan vil det ikkje verta ytt stønad om han er openbert konkurransevridande.

Ifølgje framlegget skal utval for samfunn, plan og næring vera fondsstyre og ha makt til å fordela fondskronene på søkjarane, etter innstilling frå rådmannen. Det vert to søknadsrundar i året, ifølgje framlegget.

Reglane inneber eit krav om minst 30 prosent eigenfinansiering. Arrangement som søkjer om stønad, må minimum ha regional interesse og skal fremja næring, rekruttering og godt omdøme.

Landbruk kan få stønad

I Jondal har bønder motteke store summar frå næringsfondet til Jondal kommune dei siste åra. Reglane inneheld eit eige punkt om landbrukssøkjarar. Dei som søkjer, må ha aktiv drift på landbrukseigedomen og rett til produksjonstillegg. Tiltak som legg til rette for eit meir miljøvenleg landbruk, skal prioriterast. I ein tabell er det sett fram dei maksimale grensene for ulike former for stønad.

Til dømes er det føreslege å yta maksimalt 500.000 kroner til investeringar i bygningar for husdyr som kjem inn under stønadsordningane til Innovasjon Noreg. Kjøp av mjølkekvotar utløyser maksimalt 100.000 kroner i stønad til søkjar, med ein sats på to kroner literen.

Rådmannen opplyser at reglane er drøfta med representantar for Ullensvang reiseliv, Odda by, Hardanger Industri og landbrukskontora. Næringshagen i Odda har vore med på utforminga.