Drøftar hyttesak på ny
Kvam herad godkjende hytteplanane til Øystese Røde Kors Hjelpekorps i Hamlagrø, men tre partar har klaga på vedtaket.
Hjelpekorpset søkte heradet om løyve til å dela frå ei ny tomt og byggja ei lagshytte i nærleiken av Lii, trass plankrav og nærleik til vassdrag. Tre partar har klaga på vedtaket.
Klagarane, som omfattar både privatpersonar og parkeringslaget Hamlagrøosen, har uttrykt otte for fleire sider ved prosjektet. Manglande kunngjering av vedtaket, storleiken på hytta, parkeringsproblematikk, vegtilkomst og frykt for auka trafikk og støy er mellom emna som er tekne opp.
Parkeringslaget Hamlagrøosen har uttrykt særleg uro for at den planlagde lagshytta vil føra til auka vedlikehaldskostnader, og at eksisterande parkeringsplassar ikkje vil vera tilstrekkelege. Naboar er på si side meir uroa for at hytta vil verta brukt til leirskule og kurs- og konferansesenter, noko dei meiner er i strid med det rolege hyttemiljøet i området.
I ein merknad til klagane kjem det fram at hjelpekorpset sjølv meiner det ikkje vert lagt opp til endra bruk av lagshytta, sjølv om ho aukar i storleik. Auken handlar fyrst og fremst om å kunna ta betre vare på utstyr, ha meir utstyr tilgjengeleg og betra tilhøva for rekruttering gjennom betre fasilitetar, skriv Arne Lunestad i H2 Hardanger AS på vegner av hjelpekorpset.
Klagane skal drøftast av Kvam miljø-, plan- og bygningsutval 18. september. Rådmannen meiner det ikkje er kome fram nye opplysningar som talar for å endra eller oppheva vedtaket. I vurderinga påpeikar rådmannen at dei privatrettslege tilhøva, som vegrettar og bruk av avkøyrsler, ikkje er noko heradet skal ta stilling til i denne samanhengen. Rådmannen tilrår å avslå klagane og senda saka til Statsforvaltaren for endeleg avgjerd.
