Drøfta trøbbel i bad
Fleire tiltak vert sette i verk for å hindra problem knytte til skulebading i Hardangerbadet.
Som HF skreiv i haust, har Hardangerbadet AS varsla Kvam herad om problem mellom anna med manglande låsing av dører og hærverk i badeanlegget. Kvam herad meinte på si side at slikt burde ha vore teke opp før.
Hardangerbadet tilbaud Kvam herad å kjøpa tilsynstenester. Det er det ikkje rom for i budsjettet for 2025. Rådmannen har som utgangspunkt at kommunalt tilsette skal ha tilsyn med elevane, slik i andre kommunale basseng.
Det går fram av referatet frå eit samarbeidsmøte mellom partane 8. januar. Ifylgje skrivet vert det sett i verk fleire tiltak for å førebyggja ugagn:
• Tilsette får opplæring i rutinar og bruk av anlegget kort tid etter skulestart, pluss påminningar om rutinar og ansvar.
• Sjekklista som skal sikra orden i garderobane og låsing, vert oppdatert og skal kontrollerast før badetimane.
• Hardangerbadet skal melda frå skriftleg til rektorane om avvik snarast mogeleg.
• Hardangerbadet set opp skilt på garderobedøra med informasjon om opningstidene.
I april skal tiltaka evaluerast i eit nytt møte.
