Drøfta open kyrkje i Jondal: – Truleg ikkje stor tilstrøyming
Ordninga med sommaropen kyrkje i Jondal står i fare, men kan halda fram.
Fellesrådet vedtok i møtet 18. mars å be kyrkjeverja å freista leggja til rette for sommaropne kyrkjer i Jondal, Utne, Kinsarvik, Ullensvang og Odda. Rådet fastsette ramma for ordninga til 900 arbeidstimar og kring 200.000 kroner.
Kyrkjene og sokna i Ullensvang kommune har hatt ulike ordningar for opne kyrkjer i sommarmånadene, og dei stammar frå tida før kommunesamanslåinga i 2020. Det opplyser kyrkjeverje Oddbjørn Vestbøstad i saksutgreiinga.
I Jondal, til dømes, har kyrkja vore open utan tilsyn på dagtid. Vel å merka har verdisaker vore låste inne og berre sjølve kyrkjerommet vore ope. Soknerådet og tilsette har på dugnad opna og stengt kyrkja.
– Kyrkjeverja vurderer, på svakt grunnlag, at det ikkje er stor tilstrøyming av personar til kyrkja i Jondal om sommaren, skriv kyrkjeverja.
Nokre av dei andre kyrkjene er meir populære, mellom anna av di turistbussar stoggar ved dei.
Kyrkjeverja slår fast at praksisen for opne kyrkjer varierer, men at både Riksantikvaren og forsikringsselskap er skeptiske til manglande tilsyn. I tillegg har kommunen personar som slit med rus og psykisk sjukdom, utan at ein veit om dei utgjer nokon risiko for kyrkjene.
– Stengde kyrkjer er ikkje noko godt alternativ til opne kyrkjer, og i mange sokn er det ei klar forventing om at kyrkjene er opne, skriv han.
Opne kyrkjer med tilsyn vil innebera ekstra kostnader, som altså er stipulerte til 200.000 kroner. Skal ein ta inngangspengar, slik ein gjer i stavkyrkja i Røldal, vil det gje like stor inntekt med til dømes 525 gjester per veke og ein pris på 50 kroner per billett. Med ei slik ordning krevst betalingsutstyr og administrasjon.
Saka vart drøfta av fellesrådet også våren 2022. Ei varsla sak i 2023 kom aldri frå kyrkjeadministrasjonen.
