— Dramatisk snøsmelting på Folgefonna
I sommar fekk dei tilsette ved sommarskisenteret på Folgefonna eit syn dei helst vil sleppa: fjell.
Då vart det nemleg for fyrste gong observert fjell som kom gjennom isen ved mast nummer 6 i skianlegget. Målingar i haust synte at «terskelen er svært grunn gjennom heile brefallet der skiheisen står», heiter det i søknaden.
— Dette betyr at det ikkje er mange år til ein ikkje lenger får tilførsel av is frå sjølve platået over, og at ein difor må tenkja annleis for å kunna ta vare på brefallet og sikra rammene for drift av skiheisen, skriv Visitfonna AS i ein søknad til Ullensvang kommune.
Vil omdisponera
Selskapet fekk i august ein million kroner i stønad frå det kommunale vekst og strategifondet til snøproduksjon med kanonar i den nedre delen av skianlegget. Den dramatiske snøsmeltinga i sommar har tvinga fram nye tankar. Målet no er å få breen til å veksa. No ynskjer søkjaren å omdisponera pengane og i staden nytta dei til eit forprosjekt kalla Artificial Glacier. Fondsstyret drøftar søknaden tysdag 25. januar.
— Forprosjektet skal greia ut dei tekniske sidene av eit snøproduksjonsanlegg der også effekten av dette vil verta kritisk gjennomgått. Pengane kan òg nyttast til investering i snøproduksjonsanlegg og testing av løysingar som kan medverka til å sikra eit tilstrekkeleg is- og snølag ved sommarskisenteret, heiter det i framlegget frå næringssjef Inge Håvard Aarskog.
Ifylgje søknaden vil snøproduksjon med kanonar i den nedste delen av anlegget ha liten effekt. Vona er difor å kunna produsera snø lenger oppe på breen og sikra område med nok snø i den nedre delen med hjelp av dukar som hindrar smelting. Parallelt med dette vil isen verta overvaka med isradar og dronar for å kunna syna utviklinga med 3D-modellar. Desse vil visa effekten av tiltaka over tid.
— Vil vekkja oppsikt
Prosjektet er eit samarbeid mellom Universitetet i Bergen, Bjerknessenteret og Visitfonna AS. Professor Jostein Bakke frå Jondal er sentral.
— Tiltaket vil vera spektakulært og vekkja nasjonal og internasjonal merksemd. Dessutan vil det opna for nybrotsarbeid for glasiologisk forsking, heiter det i søknaden.
Kanskje kan eit nytt forskingssenter — i søknadsdokumenta omtala som The High Mountain Research Centre — utnytta kunnskapen og det nye velkomstsenteret ved skisenteret til å danna ein «kunnskapshub» for bre- og klimaforsking. Prosjektet vil vera unikt i verda og kan setja regionen på kartet og har store verknader for lokalsamfunnet, vert det hevda.
— Stort og krevjande
— Det er positivt at sommarskisenteret søkjer dei beste løysingane for å få kontroll på issmeltinga, og at ein no går inn i eit samarbeid med viktige forskingsmiljø på feltet. Målet no er ikkje berre å redusera issmeltinga, men å få breen til å veksa. Dette er eit stort og krevjande mål. Prosjektet vil truleg ha stor internasjonal interesse, og det vil bety mykje for sommarskisenteret si framtid dersom det lukkast. Det er med dette gode grunnar til å omdisponera pengane, skriv rådmannen i vurderinga av søknaden.
Han framhevar at dei nye vurderingane kjem frå eit framståande forskingsmiljø som han meiner det er grunn til å lytta til.
