Doserer fylgjer for fonna av klimaendringar
Geolog og glasiolog Jostein Bakke ved Universitetet i Bergen og Bjerknessenteret føreles måndag 14. februar i Kabuso.
Temaet er tilhøva på Folgefonna i lys av at klimaet vert varmare og våtare. Bakke vil snakka om kva han trur er i vente i regionen. Han er oppteken av korleis klimaet påverkar ulike prosessar i naturen, ifylgje ei pressemelding frå arrangør Kvam Senioruniversitet.
I føredraget vil jondølingen særleg leggja vekt på kva som kjem til å skje med Folgefonna, smeltevassdreneringa ut frå denne og korleis flaumar og ras kjem til å påverka regionen i framtida.
Bakke er professor ved Universitetet i Bergen ved institutt for geovitskap, der han arbeider med kvartære geosystem, det vil seia den yngste perioden i jordhistoria, dei siste 2,6 millionar åra.
Bakke tok doktorgraden i 2004 med avhandlinga Late Weichselian and Holocene glacier fluctuations along a coastal south-north transect in Norway — climatic and methodological implications.
