Donerer aggregat til Ukraina
Lingalaks AS har gjeve eit straumaggregat til Fotball for Ukraina.
Organisasjonen, med kvemming Roald Flodsand som ein sentral figur, skal formidla anlegget til det krigsråka landet. Jan Mo AS har utan kostnad transportert anlegget til Borgund i Lærdal.
Planen, fortel Flodsand, er å få sendt det vidare med til dømes ein austeuropear som køyrer tungtransport. Aggregatet er fire meter langt, to meter høgt og éin meter breitt, fortel han.
– Me er veldig glade for slike førespurnader, seier Flodsand.
Administrasjons- og kontorkoordinator i Lingalaks, Hilde Øvrehus Haugarvoll, opplyser at det er snakk om eit John Deere dieselaggregat på 230 volt og 220 kilowatt. Det er frå 2015.
Det har vore nytta på ein fôrflåte, men er fasa ut på grunn av alder og brukstimar, men er i orden.
Ideen til gåva kom på grunn av ein tidlegare artikkel i HF om at lokale krefter sende utstyr til Ukraina, opplyser Haugarvoll i ein e-post.
– Det er lett å tenkja seg at behovet for generatorar er stort. Me får håpa det gjer nytte for seg, skriv ho.
